Ձեր վստահելի աղբյուրը

«Արցախի ինքնորոշման հարցում նշաձողի իջեցումը մեզ համար անընդունելի է, այն բերելու է Արցախի վերջնական հայաթափում ու կործանում, այնուհետև՝ Հայաստանի ու հայկական պետականության»,-  ասուլիսում ասա ՀՅԴ ԳՄ ներկայացուցիչ, «Հայաստան» դաշինքի անդամ Իշխան Սաղաթելյանը։

Նա նշեց, որ այս իրավիճակում իրենք հստակ որոշում են կայացրել և հայտարարել այդ մասին՝  իբրև խորհրդարանական ընդդիմություն իջնում են փողոց ժողովրդի ցասումը կազմակերպելու, այս իշխանություններին օր առաջ հեռացնելու։

«Անցող մեկ շաբաթվա արդյունքում այն խնդիրը, որը դրել էինք մեր առջև, հստակ կարողացել ենք իրականացնել։ Գլխավոր հարցը, որ անցնող շաբաթվա ընթացում մեր ժողովուրդը լուծել է, թշնամի երկու պետություններին, մեզ բարեկամ և ոչ բարեկամ երկրներին, միջազգային հանրությանը հստակ մեսիջ է հղել, որ Նիկոլը չունի մանդատ երկիրը նոր զիջումների տանելու, սա մեր ժողովրդի ու հանրության կողմից անընդունելի է։

Եթե իրենց թվում է, թե հայ ժողովրդին այլևս հետաքրքիր չէ Արցախը, կարող են երկիրը տանել նոր զիջումների ու մարսել, անցնող մեկ շաբաթվա ընթացքում հայ ժողովուրդը ցույց տվեց, որ դա հնարավոր չէ  և դա չի ընդունում»,- ասաց Իշխան Սաղաթելյանը։ 

Ընդդիմադիր քաղաքական գործչի խոսքով, վաղվանից անցնում են իրենց վճռական պայքարի շատ կարևոր փուլի մեկնարկին, որը կարճ ժամանակ հետո բերելու է  այս իշխանության հեռացմանը։

«Կարճ ժամանակ անց հայ ժողովուրդը կապացուցի, որ Նիկոլը մանդատ չունի, լեգիտիմ չէ, հերթական անգամ խաբել է մեր ժողովրդին և պետք է հեռանա։ Դա անելու ենք հանրային լայն ժողովրդական ճնշման տակ, և այդ պրոցեսն արդեն սկսված է»,- հայտարարեց Իշխան Սաղաթելյանը։

Նա տեղեկացրեց, որ վաղը իրենց չորս խմբերը քայլարշավով կմտնեն Երևան, 16։00-ին  կլինեն Ֆրանսիայի հրապարակում, կունենան մեծ հանրահավաք և կհայտարարեն իրենց հետագա քայլերի, գործողությունների մասին։ 

«Լինելու են անհնազանդության ակցիաներ, մեր ժողովուրդը դուրս է գալու փողոց և արդեն փողոցում է, հասնելու ենք նրան, որ ցույց տալու, որ ինքն այլևս իշխանություն չունի Հայաստանում։ Մենք մարդկանց փողոց ենք կանչում ոչ թե սուտ խոստումներով, կեղծիքներով, այլ մարդիկ իրենք հասկանալով մեր երկրին սպառնացող վտանգները, հասկանալով որ սեղանին դրված է Հայաստանի, Արցախի լինելության հարցը, իրենք  դուրս են եկել, մեր խնդիրն է այս ամեն ինչը կազմակերպել։

Սա իշխանություն-ընդդիմության պայքար չէ, համաժողովրդական պայքար է, մենք խնդիր ունենք Հայաստանը ստեղծված իրավիճակից դուրս բերել։ Սա իշխանության համար պայքար չէ»,- ասաց Սաղաթելյանը։ 

Նրա խոսքով, բոլորին առաջնորդողը հայրենիքի փրկության գաղափարն է։

«Այսօր մեր քաղաքացիներից որևէ մեկը չի գալիս հրապարակ՝ ինձ, իմ գործընկերոջը կամ որևէ քաղաքական ուժի իշխանության բերելու համար։ Մարդիկ այսօր դուրս են եկել փողոց, որովհետև հասկանում են, որ իրենց պետականությունը կորցնում են։

Հետևաբար, սրան հեռացնելուց հետո հաջորդ կառավարությունը չի լինելու մեկ անձի, մեկ կուսակցության, մեկ առաջնորդի կառավարություն։ Լիելու է արժանիների կառավարություն, պրոֆեսիոնալ կառավարություն, որը ձևավորվելու է պայքարին մասնակցած ուժերի կողմից, և այն անձը, ով լինելու է վարչապետ, պետք է ունենա հանրային լայն վստահություն», - նշեց ընդդիմադիր քաղաքական գործիչը։

Հարցին՝ հավակնո՞ւմ է արդյոք ինքը վարչապետի պաշտոնին, Իշխան Սաղաթելյանը պատասխանեց. «Ես պայքարի դուրս չեմ եկել վարչապետ դառնալու համար։ Ես պայքարի դուրս եմ եկել, որ Հայաստանը, առհասարակ, վարչապետ ունենա, որովհետև եթե այսպես շարունակվի, Հայաստան չի լինելու, որ մի հատ էլ Հայաստանը վարչապետ ունենա»։