Ձեր վստահելի աղբյուրը

«Եթե ԱԱԾ-ն և ոստիկանությունն այդքան շատ մտածում են մեր երկրի անվտանգության մասին, ապա երկրի անվտանգության թիվ մեկ սպառնալիքը նստած է կառավարության շենքում։ Պետական դավաճանության հոդվածով հիմա կարող են ձերբակալել ու դրանով երկրին շատ օգտակար կլինեն»,-  ասուլիսում ասաց ՀՅԴ ԳՄ ներկայացուցիչ, «Հայաստան» դաշինքի անդամ Իշխան Սաղաթելյանը՝ անդրադառնալով այսօր  ընդդիմության հավաքների վերաբերյալ ԱԱԾ-ի և ոստիկանության տարածած հայտարարություններին։

Նրա  խոսքով, ակնհայտ է, որ ԱԱԾ-ն և ոստիկանությունը լուրջ ճնշման տակ են օրվա իշխանության և Նիկոլ Փաշինյանի կողմից։

«Շատ հետաքրքրիր են նաև Նիկոլին սպասարկող և օտարածին միջոցներով սնվող ուժերի երեկվանից սկսած վայնասունը՝ ինչո՞ւ ոստիկանությունն ու ազգային անվտանգությունը  չեն կոտորում ընդդիմությանը։ Այսինքն, ակնհայտ է, որ ճնշելու և դրդելու են, որ ԱԱԾ-ն և ոստիկանությունն ապօրինի միջոցներով քայլեր ու գործողություններ իրականացնեն ընդդիմության և խաղաղ, անհնազանդության բողոքի դուրս եկած քաղաքացիների նկատմամբ», - ասաց ընդիմադիր քաղաքական գործիչը։

Իշխան Սաղաթելյանը զգուշացրեց՝ չգնան այդ քայլին.  «Նիկոլն ամեն ինչ անելու է, որ իրենց ևս մասնակից դարձնի ապօրինություններին, իսկ այդ ուժերը, որոնք անընդհատ դրդում են ոստիկանությանը, շարունակելու են դրդել։ Նրանք պետք է տեղիք չտան դրան, մնան օրենքի և իրենց լիազորությունների շրջանակում։ Մեր սահմանադրական իրավունքն է դուրս գալ փողոց, մեր անհնազանդությունն ու խաղաղ բողոքի ակցիաներն իրականացնել։

Հասկանում եմ, որ իրենց շատ են ճնշելու, թող սադրանքի մաս չդառնան, հանուն մեր պետության, հանուն մեր երկրի ու հանուն իրենց ուսադիրների իրենք չպետք է դառնան  Նիկոլի ու նրան սպասարկող  խունտայի ձեռքին գործիք։ Եթե կգնան այդ ճանապարհով ու կկիսեն այս ամբողջ պատասխանատվությունը, դրա համար էլ հետո  պատասխան կտան», - ասաց Իշխան Սաղաթելյանը։

Նա նաև հայտնեց, որ բազմաթիվ տեղեկություններ ունեն՝ խմբեր կան, որոնք դիմելու են սադրանքների, իրենց ներկայացնեն խմբավորումներ։

«Նման սադրանքներ փորձելու են անելու, բայց ամեն ինչ արդեն վերջացած է, չի անցնելու այդ սադրանքները։ Կոչ եմ անում ոստիկանությանն ու անվտանգությանը զբաղվել Նիկոլի շրջապատի սադրիչ խմբերով, որոնք արդեն կան ու գոյություն ունեն»,- ասաց Իշխան Սաղաթելյանը։