Ձեր վստահելի աղբյուրը

Ֆրանսիայի հրապարակում ընթացքող համազգային հանրահավաքին ԱԺ «Հայաստան» խմբակցության պատգամավոր Գեղամ Մանուկյանը ելույթ ունեցավ Սարդարապատից բերված Արցախի դրոշը ձեռքին։

«Սա Արցախի այն դրոշն է, որ ճանապարհ ելավ Սարդարապատից, իսկ ճանապարհին մեր հարյուրավոր քաղաքացիներ վանկարկում էին՝ «Արցախ, Արցախ»։ Սարդարապատի հերոսամարտում ամենահերոսներն ու քաջերը Դանիել Բեկ-Փիրումյաններն էին, ամենահերոսականը Ղարաբաղի մահապարտ գունդն էր։ Հիմա հերթը մերն է՝ հանուն Արցախի, հանուն Արցախի հայկականության, Արցախի պետականության»,- ասաց նա։

Այս խոսքերից հետո բեմահարթակ բարձրացավ փոքրիկ մի տղա։ Գեղամ Մանուկյանն ասաց, որ նա սովորում է Գյումրիի Չարենցի անվան դպրոցում, իր մայրիկի հետ միացել է իրենց Վաղարշապատում ու միասին քայլելով հասել են Երևան։

Նա տղային հարցրեց, թե ինչի է իրենց միացել և քայլում, փոքրիկ Արմենը պատասխանեց. «Ուզում եմ քայլել իմ Հայաստանի ու Արցախի, իմ հայրենիքի համար, որ մի օր ապրենք հզոր Արցախում և Հայաստանում»։

Գեղամ Մանուկյանն ասաց, որ վերջն օրերին անցել են Սարդարապատով, գյուղերով, որտեղ մեջքները կռացած կանայք, տղամարդիկ աշխատում էին և շնորհավորեց բոլոր աշխատավորների տոնը՝ անկախ նրանից, որ այսօր զորակցում են իրենց, թե ոչ։ «Շնորհավորում եմ նաև նրանց, որոնք ճանապարհին ասում էին՝մեզ հետ համաձայն չեն, այս իշխանությունների հետ են»,- նշեց Գեղամ Մանուկյանը։

Նա նկատեց, որ Արմավիրում, որտեղ ծնվել և ապրել է, որտեղ վերջին ընտրություններին ներկայիս իշխանություններն ահռելի ձայներ են հավաքել, վախով է քայլել, բայց այս ընթացքում հասկացել է՝ չկա այլևս ստի իշխանությունը, մարդիկ ելնում են ոտքի։

Այս խոսքերից հետո Գեղամ Մանուկյանը սկսեց վանկարկել՝ «Տեր ենք մեր հայրենիքին և տիրոջ իրավունքով ասում ենք՝ առանց թուրքի Հայաստան»։ Գեղամ Մանուկյանին միացան նաև Ֆրանսիայի հրապարակում հավաքված քաղաքացիները։