Ձեր վստահելի աղբյուրը

Արդեն մի քանի օր է 44-օրյա պատերազմում զոհված զինծառայողների ծնողները պայքարում են հարուցված քրեական գործով որպես տուժող ներգրավվելու իրենց պահանջի բավարարման համար։

Ասուլիսում «Հայաստան» խմբակցության պատգամավոր, իրավաբան Արթուր Ղազինյանն ասաց, որ դատախազի ցուցումը, որը ենթակա է կատարման  պարտադիր կարգով, ներկայացված է  վարույթ իրականացնող մարմնին՝ քննիչին, որն  արդեն հինգերորդ օրն է, օգտագործելով շաբաթ-կիրակի օրերը, մինչ այս պահը չի կատարել դատախազի ցուցումը և չի ներգրավել ծնողներին որպես  տուժողների իրավահաջորդ։

«Դատախազը, որ հսկում է այդ քրեական գործը, խոստացել է, երաշխավորել է մեր հերոսների ծնողներին, եթե այսօր մինչև օրվա վերջ քննիչը չկատարի իր պարտականությունը և ցուցումը, որ տրվել է դատախազի կողմից, ապա դատախազն, օգտագործելով իր սահմանադրական և օրենսդրական լիազորությունները, ինքը կկայացնի այդ որոշումը և կտրամադրվի տուժողի դատավարական կարգավիճակ»,- ասաց նա։

Ղազինյանի խոսքով, սա ենթադրում է, որ այդ պահից սկսած հանցագործության դեպքն այլևս  համարվում է հաստատված, որ, այո, եղել է  հանցագործություն։

«Դա  նշանակում է, որ քրեական գործն այլևս չի կարղ կարճվել, իսկ տուժողները ստանում են օրենքից բխող իրավունքներ, օրինական շահեր, որոնք կարող են ներկայացնել վարույթն իրականացնող մարմնին պահանջների, միջնորդությունների և դիմումների ձևով»,- ասաց նա։

Արթուր Ղազինյանը կարծում է, որ ծնողներն ունեն բավարար կամք, ամրություն, նպատակասլացություն հասնելու իրենց որդիների մահվան մեջ մեղավոր բոլոր անձանց  բացահայտման և նրանց օրենքի ամբողջ խստությամբ քրեական պատասխանատվության ենթարկելու պահանջին։

«Որևէ մեկն այն չի կարող կասեցնել ու վիճարկել, այս գործը բացահայտվելու է,  այս գործով բոլոր  մեղավորները բացահայտվելու են և ենթարկվելու են քրեական պատասխանատվության»,- նշեց Ղազինյանը։