Ձեր վստահելի աղբյուրը

Երևանում անհնազանդության ակցիաները շարունակվում են, մի շարք փողոցներ փակ են։ Դրան զուգահեռ ոստիկանները շարունակում եմ բռնի ուժ կիրառել քաղաքացիների նկատմամբ և բերման ենթարկել նրանց։

Լեհաստանում ՀՀ նախկին դեսպան, ՍԴ աշխատակազմի նախկին ղեկավար Էդգար Ղազարյանը  ոստիկանության գործողությունները քաղաքացիների նկատմամբ համարում է որպես առևանգում։

«Սա չի կարելի համարել ձերբակալություններ կամ բերման ենթարկելու դեպք, սա առևանգում է։ Այսինքն՝ ոստիկանական համազգեստով մարդիկ, դեռ հետագայում քննությունը կպարզի՝ նրանք ոստիկաններ են, թե խուլիգաններ, առանց որևէ նախազգուշացման առևանգում են մարդկանց»,- ասաց Էդգար Ղազարյանը՝ հավելելով, որ դա մի շարք օրենքների խախտում է։

Նա նշեց, որ այսօր մայրաքաղաքում մեծ թվով ոստիկաններ կան։ «Կարո՞ղ է Նիկոլ Փաշինյանը այսքան ոստիկաններին, գունավոր, սև բերետավորներին ուղարկի Գորիսից Կապան՝ բացելու թուրքի փակած ճանապարհը։ Հիմա նրանք կարո՞ղ են թուրքերի փակած ճանապարհը բացել, թե կարո՞ղ են միայն բացել ՀՀ քաղաքացիների Երևանի կենտրոնում փակած ճանապարհը: Սա ցույց է տալիս ոստիկանության և այս իշխանության իրական խեղճության աստիճանը։ Որքան թշվառ վիճակում են նրանք գտնվում, որ այդքան ոստիկաններով երիտասարդների, աղջիկների նկատմամբ ուժ են կիրառում, որ ինչ է ճանապարհ բացեն»,- նշեց էդգար Ղազարյանը։

Մինչդեռ, ըստ նրա, այս իշխանությունների պատճառով մեր երկրի ճանապարհներն են փակ։

«Կարծում եմ, որ սրանք հոգեվարքի նշաններ են, պարզ է, որ այս գործողությունները ոչ մի արդյունք չեն տալու։ Արդեն գիտենք, որ կան բազմաթիվ բերման ենթարկվածներ քաղաքի տարբեր հատվածներից և սա խոսում է այն մասին, որ մարդիկ համոզվեն՝ մեզ ղեկավարում է հայ ժողովրդի ամենամեծ թշնամին, և նա կարողանում է քաղաքացիներին, որոնք կրում են ոստիկանական համազգեստ, հանել հայերի դեմ։ Թուրքերին դարձրել է իրեն բարեկամ, հայերին՝ թշնամի, քանի որ ինքն իր էությամբ հայ ժողովրդի ամենամեծ թշնամին է»,- նշեց Էդգար Ղազարյանը։