Ձեր վստահելի աղբյուրը

«Մենք այսօր առավոտից ականատես եղանք, որ կարմիր բերետավորների, սև բերետավորների շարքերում  կային անձինք, ձեռնպահ կմնամ նրանց ոստիկան անվանելուց, ովքեր գործում էին ամենաբռի, ամենախուլիգանավարի վարքագծով»,- ասուլիսում ասաց «Հայաստան» խմբակցության պատգամավոր Էլինար Վարդանյանը։

Նա նշեց, որ երբ բերման ենթարկվածների հետևից գնում են ոստիկանական բաժանմունքներ,  ականատես են լինում իրենց աշխատանքը բարեխիղճ կատարող ոստիկանների, կարելի է  ֆիքսել բազմաթիվ ոստիկանների լուռ անհանգստությունը կապված մեր երկրի զարգացման, ապագայի հետ, ինչը չեն կարող ասել կարմիր ու սև բերետավորների շարքերում առանձնացող մի քանի խուլիգանի հետ կապված, որովհետև այն բռնությունը, որ նրանք կիրառում են հավաքների ազատության իրավունքն իրացնող մարդկանց նկատմամբ, պարզապես անթույլատրելի է։

«Մի կարևոր շեշտադրում եմ ուզում անել. որքան էլ մեր երիտասարդներին մարմնական վնասվածքներ պատճառեն, որքան էլ փորձեն  իրենց այդ գործողություններով հաճոյանալ իրենց շեֆին, արդյունք չի տալու։

Մեր երիտասարդներից մեկը ոստիկանների գործողությունների հետևանքով կողոսկրի կոտրվածք էր ստացել, բայց հիվանդանոցից դուրս գալուց հետո շտապել է Ֆրանսիայի հրապարակ, միացել մեզ»,- ասաց Է.Վարդանյանը։

Նա նշեց, որ իրենց ակցիաների ընթացքում բազմաթիվ մեքենաներ կանգնել են ու ողջունել այդ գործողությունները, թեև եղել են բացառություններ։

«Հետևաբար, առանձին ոստիկանների գործողությունները, որոնք իրենց խուլիգանի պես են պահում, չի ունենալու որևէ արդյունք, հետևանք։ Այդ ոստիկանները, ինչպես իրենց շեֆն է ասում, հատ առ հատ պատասխան են տալու, ենթարկվելու են պատասխանավության՝ կլինի այսօրվա իշխանության օրոք, թե շատ կարճ ժամանակ անց  նոր իշխաության օրոք։ Նրանք պատասխան են տալու բոլոր ատյաններով, նրանց նմանները պարզապես իրավունք չունեն գտնվել ոստիկանության շարքերում, նրանք  արատավորում են այն ոստիկաններին, ովքեր գիշերը պահպանում էին մեր անդորրը, հանգիստը»,- ասաց Էլինար Վարդանյանը։

Ասուլիսին ներկա «Հայաստան» խմբակցության պատգամավոր Արթուր Ղազինյանը նշեց, որ ոստիկանների գործողություններում եղել են օրինախախտումներ, ոչ հիմնավոր ֆիզիկական ուժի գործադրման կոնկրետ դեպքեր. «Քաղաքական առումով ես սա կբնորոշեմ որպես իշխող վարչախմբի փորձ ոստիկանությունը վերածել վարձկանների խմբի, որոնք հրամանով կհարձակվեն իշխանության դեմ խոսացող, հանդես եկող, պայքարող ցանկացած մարդու դեմ»։

Անդրադառնալով ՀՅԴ-ական Գերասիմ Վարդանյանի ձերբակալությանը, Ա.Ղազինյանն ասաց, որ ակնհայտ ապօրինի և քաղաքական դրդապատճառներով  է կազմակերպված նրա ձերբակալությունը և նրան կրկին անգամ կալանավորելու միջնորդությամբ դատարան դիմելու քննչական մարմնի որոշումը։

«2020 թվականի նոյեմբերի 9-10 իրադարձություններով Գերասիմ Վարդանյանն անցնում է քրեական գործով, մեկ անգամ ԱԱԾ քննչական մարմինը փորձել է  հասնել կալանավորման, սակայն դատարանը չի բավարարել  միջնորդությունը, հիմա նոր քաղաքական իրողությունների պայմաններում ԱԱԾ-ն կրկին փորձում է  մեկուսացնել պայքարի շարքերից մեր նվիրյալ տղերքից երևի թե ամենաակտիվներից մեկին։ Սա որակում եմ որպես քաղաքական դրդապատճառներով իրականացված ձերբակալություն, ապօրինություն, որպես պայքարին խոչընդոտելու և այն թուլացնելու քաղաքական փորձ»,- ասաց ընդդիմադիր գործիչը՝ ընդգծելով, որ դա որևէ կերպ չի կարող ազդել պայքարի դուրս եկած մեր քաղաքացիների ոգու և հանձնառության վրա։

«Որքան էլ ձերբակալեք, բերման ենթարկեք, միևնույնն է՝ պայքարը չի ավարտվելու, ի հեճուկս  թուրք-ադրբեջանական  գործակալական ցանցի ավելի ուժեղանալու է ու հասնելու է տրամաբանական ավարտին։ Այս ոգին որևէ մեկին չի հաջողվի կոտրել»,- նշեց Արթուր Ղազինյանը։