Ձեր վստահելի աղբյուրը

Մայիսի 1-ից հունիսի 1-ը Հայաստանում անցկացվում է գառան մսով կերակրատեսակների #GARoon IV փառատոնը, որն առաջարկում է  հեղինակային ուտեստներ համտեսել չորս տարբեր վայրերում՝ Երևանում, Ծաղկաձորում, Դիլիջանում և Արցախում։

Կազմակերպիչների փոխանցմամբ, փառատոնի մեկնարկի նախօրեին ամեն տարի անցկացվում է մեդիա համտես, որտեղ մասնակիցները մտերմիկ մթնոլորտում ոչ միայն ներկայացնում են ճաշացանկի լավագույն ուտեստները, այլև կիսվում են իրենց ցանկություններով և նորարարական մոտեցմամբ:


 

Անդրանիկ Գրիգորյանը և The Club-ը մասնակիցներին առաջարկեցին կակաոյի յուղով և շոկոլադե կարագով պատված գառան փորոտիքից պաշտետ (Պատե գառան ներքին օրգաններից)՝ բոված պնդուկի միջուկով և համեմված թեյասնկից պատրաստված սրճային սոուսով: Ուտեստը մատուցվեց որպես նախուտեստ՝ կեչու հյութով: Ճաշատեսակի բաղադրիչների մեծ մասը ռեստորանի աշխատակիցներն անձամբ են հավաքում Հայաստանի տարբեր մարզերից:




Baklachoff Collection-ը, «Չայհոնա» և «Կովկասի գերուհին» ռեստորանների շեֆ-խոհարարները՝ Արթուր Ավագյանը և Արթուր Սահակյանը, զարմացրեցին արևելյան փառահեղ խոհանոցով` ներկայացնելով  Մակբուս՝ զաֆրանով և գաղտնի համեմունքներով,  գառան բուրավետ ազդրով փլավ։



Վալերի Բաղդագյուլյանն ու «Կիլիկիա»-ն հյուրերին գերեցին դոլմա Ուդոլիի ուրարտական բաղադրատոմսով. ուտեստում գառան մսին, ծիրանաչրին և բլղուրին հակադրված էր կաղամբի տերևների նրբությունը:  «Մետաքսի ճանապարհ» մրցույթի դափնեկիր դարձած ճաշատեսակը վաղուց նվաճել է միջազգային գաստրո հարթակները։


Margaryan Business Group-ը և «Ոստան» ռեստորանի շեֆ խոհարար Հովհաննես Նշանյանը որոշեցին համտեսի մասնակիցներին տպավորել մատուցված ուտեստի մասշտաբով և համային հակադրությամբ՝ ներկայացնելով 12-ժամյա «լոգանքից» հետո տաք ապխտման ենթարկած գառան կողիկներ պատրաստված հատուկ մարինադում։

«Մարգարյան բիզնես գրուպի» հիմնադիր Կարեն Մարգարյանի խոսքով, փառատոնը նպաստում է ռեստորատորների գաղափարների համախմբմանը, մարզերի համային առանձնահատկությունները և շեֆ խոհարարների ստեղծարարությունը հանրահռչակելուն, ինչպես նաև` տեղական արտադրողների և ֆերմերների ակտիվ մասնակցությանը։

Հայաստանի փառատոների տնօրեն Նունե Մանուկյանը շնորհավորեց #GARoon-ի մասնակիցներին ախորժելի մեկնարկի կապակցությամբ և մաղթեց տարեցտարի մեծացնել մասշտաբները, ներգրավելով նոր մասնակիցների՝ ուրախացնել զբոսաշրջիկներին և տեղի բնակիչներին փառատոնային միջոցառումներին ոչ ստանդարտ մոտեցմամբ։ 



Հայաստանի զբոսաշրջության կոմիտեից Ֆլորա Աթոյանը գուրմաններին մաղթեց նոր համային փորձառություն և նկատեց, որ այս տարի փառատոնը բացվել է «Ոստան»-ում գեղեցիկ տոնակատարությամբ: Այդ մեկնարկը խորհրդանշական է. 2019 թվականին #GARoon-ը սկիզբ է առել հենց «Ոստանում»։

Meyron Wine ապրանքանիշի հիմնադիր Մհեր Տերտերյանը, նշելով համտեսի ժամանակ գինու և գառան մսի կազմած կատարյալ համադրության մասին, խոստացավ #GARoon-ի ամսվա ընթացքում այցելել փառատոնի բոլոր մասնակիցներին և ճաշակել հնարավորինս շատ նոր կերակրատեսակներ։

Գառան մսով կերակրատեսակների մեծ սիրահար, փառատոնի արդեն մշտական փորձագետ, մոդելավորող Ֆաինա Հարությունյանն ասում է. «Փառատոնի ճաշացանկի մի մասը փորձեցինք, իսկ հյուրերն անմիջական մթնոլորտում կիսվեցին ճաշատեսակների մասին իրենց մտքերով ու տպավորություններով` ավելի հաճախ՝ զարմացած գովաբանելով դրանք։ Եվ, հավատացեք, գովելու բան կար։ Ես համեմունքների սիրահար եմ և ինձ շատ դուր եկավ «Չայհոնա» ռեստորանի «Մակբուս»-ը, իսկ «Ոստան»-ի մսով ուտեստը  զարմացրեց ոչ միայն մատուցմամբ, այլև տապակվածության հատուկ աստիճանով։ The Club-ը մեզ ուրախացրեց ամենաարտասովոր ուտեստով, իսկ «Կիլիկիա»-ի Ուդոլի տոլման, անկասկած, այն ուտեստն է, որով մենք կհիացնենք մեր չքնաղ երկրի հյուրերին»։

Մարզերից մասնակիցները տեխնիկական խնդիրների և ծանրաբեռնվածության պատճառով չկարողացան ներկա գտնվել մեդիա համտեսին, սակայն հեռակա տպավորեցին հյուրերին։



Tumanyan’s Art Wine House-ից Քրիստին Բալայանը (Ստեփանակերտ) փառատոնի երկրպագուների համար պատրաստել էր գառան մսով և չորացրած թթով  աղցանի բաղադրատոմս։

ImToon ռեստորանը կիսվել է #GARoon մենյուից ախորժելի լուսանկարներով:

Վարդա Ավետիսյանը կարծում է, որ իսկական գուրմանները անպայման պետք է գան Դիլիջան և համտեսեն մարոկկական թավա՝ օջախի կրակի վրա եփած գառան կոտլետներ, կծու հարիսա սոուսով, մատուցված կուսկուսի, սիսեռի, չոր մրգերի և թարմ խոտաբույսերի հետ։