Ձեր վստահելի աղբյուրը

Այն երկրների թիվը, որտեղ հայտնաբերվել են կորոնավիրուսի «Օմիկրոն» շտամի տարբեր ենթատեսակներ, աճում է։ Այս մասին նշված է Առողջապահության համաշխարհային կազմակերպության (ԱՀԿ) կողմից ներկայացված COVID-19-ի շաբաթական համաճարակաբանական ամփոփագրում, փոխանցում է «Ռիա Նովոստի» գործակալությունը։

««Օմիկրոն»-ի երեք ենթատեսակները BA.4, BA.5 և BA.2.12.1 ձեռք են բերել մի քանի լրացուցիչ մուտացիաներ: Համաձայն վիրուսի գենոմների տվյալների միջազգային բազայի՝ GISAID-ի, ԱՀԿ-ի և պետությունների տարածաշրջանային բաժանմունքների հաշվետվությունների, երկրների թիվը, որոնք հայտնում են այս երեք տարբերակների հայտնաբերման մասին, աճում է»,- ասվում է փաստաթղթում:

Միաժամանակ, ըստ ԱՀԿ-ի, կորոնավիրուսի նոր դեպքերի թիվը շարունակում է նվազել։ Մասնավորապես, ապրիլի 25-ից մայիսի 1-ն ընկած ժամանակահատվածում վարակվածների թիվն աշխարհում նվազել է 17%-ով, իսկ մահերի թիվը՝ նախորդ շաբաթվա համեմատ (ապրիլի 18-ից 24-ը) նվազել է 3%-ով։

Նշվում է, որ 2022 թվականի մայիսի 1-ի դրությամբ ամբողջ աշխարհում գրանցվել է վարակման ավելի քան 500 միլիոն հաստատված դեպք և կորոնավիրուսից ավելի քան վեց միլիոն մահ: