Ձեր վստահելի աղբյուրը

«Մեզ բոլորին պետք է արդյունք և այն ճանապարհային քարտեզը, որ այստեղից հնչեցրել ենք, հերթով իրականացնելով գնալու ենք։ Մենք մեր գործի 60-70 տոկոսն իրականացրել ենք, մնացել է մնացած հատվածը,գնում ենք առաջ»,- Ֆրանսիայի հրապարակում հանրահավաքի ժամանակ ասաց ՀՅԴ ԳՄ ներկայացուցիչ Իշխան Սաղաթելյանը։

Խոսելով վաղվա ծրագրերի մասին, նա հայտնեց, որ ժամը 13։00-ին հանրահավաք են հրավիրում Վանաձորում։

«Բոլոր նրանք, ովքեր ցանկանում ենք ավտոերթով շարժվել դեպի Վանաձոր, ժամը 9։30-ին Աշտարակի խճուղու վրա մեքենաներով կշարժվենք, պարտադիր դրոշներ պետք է լինեն։ Ճանապարհին տարբեր բնակավայրերում կանգառներ կունենանք»,- ասաց նա։

Ի.Սաղաթելյանը  տեղեկացրեց, որ ժամը 12։00-ին Ֆրանսիայի հրապարակից կմեկնարկի երթ, որին, քաղաքացիների առաջարկությամբ, կմասնակցեն բացառապես կանայք և աղջիկները։

«Մեր հայրենակիցներն առաջարկում են վաղը ժամը 13։00-14։00-ն Երևանում մեքենաներից բարձր հնչի «Զարթնիր լաո» և «Արցախն է կանչում» երգերը, ծածանվելու է Հայաստանի ու Արցախի դրոշները»,- ասաց նա։

Սաղաթելյանը հայտարարեց, որ ժամը 18։00-20։00-ն Ֆրանսիայի հրապաակում տեղի կունենա մշակութային ծրագիր, իսկ  20։00-ին կկայանա հանրահավաք, որից հետո տեղի կունենա հերթական երթը։

«Պայքար, միություն, հաղթանակ»՝ վանկարկեցին հրապարակում հավաքված հազարավոր քաղաքացիները։