Ձեր վստահելի աղբյուրը

«Երբ խոշորացված համայնքներում ինչ-ինչ պատճառներով ղեկավար չի ընտրվում, այս փոփոխությամբ հնարավորություն է ընձեռվում, որպեսզի համայնքի բնականոն կառավարումը շարունակելու համար վարչապետը պաշտոնակատար նշանակի»,-Աժ այսօրվա արտահերթ նիստում ներկայացնելով միակ՝ «Տեղական ինքնակառավարման մասին» օրենքում լրացում կատարելու մասին նախագիծը՝ հայտնեց օրենքի համահեղինակ, ՔՊ պատգամավոր Վահագն Հովակիմյան:

Նա տեղեկացրեց, որ «Տեղական ինքնակառավարման մասին» օրենքի 102-րդ հոդվածի 6-րդ մասը նախատեսում է, որ եթե օրենքով միավորված համայնքի ավագանու առաջին նիստն ավագանու լիազորությունները ստանձնելու պահից քսան օրվա ընթացքում չի գումարվում կամ «Տեղական ինքնակառավարման մասին» օրենքի 69-րդ հոդվածի 2-րդ մասով սահմանված կարգով այդ ավագանու լիազորությունները վաղաժամկետ դադարեցվում են, ապա Հայաստանի Հանրապետության վարչապետը նշանակում է համայնքի ղեկավարի պաշտանակատար մինչև օրենքով սահմանված կարգով նորընտիր համայնքի ղեկավարի լիազորությունների ստանձնումը:

Հովակիմյանի խոսքով՝ առաջարկվող փոփոխությամբ համայնքի ղեկավարի պաշտոնակատար նշանակելու դեպքում «Տեղական ինքնակառավարման մասին» օրենքի 19-րդ հոդվածի 1-ին մասի 2-րդ կետով սահմանված սահմանափակումը հանվում է:

ՔՊ պատգամավորը բացատրեց, որ այդ գործող  սահմանափակմամբ ավագանու անդամը չի կարող միաժամանակ լինել համայնքի ղեկավար, համայնքի ղեկավարի պաշտոնակատար կամ վարչական ղեկավար, և այն հանելով վարչապետը հնարավորություն կունենա համայնքի ղեկավարի պաշտոնակատար նշանակել նաև ավագանու անդամներից մեկին:

«Սրանով մենք ՀՀ վարչապետին հնարավորություն ենք տալիս, որպեսզի իր քաղաքական կամքն իրացնելիս անկաշկանդ լինի»,-հայտարարեց նախագծի համահեղինակը:

ՔՊ-ական պատգամավորներն առանց ընդդիմախոսության քննարկեցին և 66 ձայնով առաջին ընթերցմամբ ընդունեցին նախագիծը, որի երկրորդ ընթերցմաբ քննարկումը կանցկացվի 3 ժամից:

ԱԺ դահլիճում քննարկման իմիտացիա էր ստեղծում նախագահող Ալեն Սիմոյնաը՝ պարբերաբար լռության կոչ անելով դահլիճում խելոք նստած պատգամավորներին: