Ձեր վստահելի աղբյուրը

Սյունիքի մարզի ընդհանուր իրավասության դատարանի դատավոր Բորիս Բախշիյանն ազատ արձակվեց «Վարդաշեն» ՔԿՀ-ից։ Նրան  ՔԿՀ դիմաց  դիմավորեցին փաստաբաններ, դատավորներ։

Հիշեցնենք, որ դատավոր Բորիս Բախշիյանի կալանավորման ժամկետը չի երկարացվել և, ըստ այդմ, դատավորն այսօր ազատ է արձակվել։

«Ինչպես և երեք ամիս առաջ, այսօր էլ նույն այն կարծիքին եմ և պնդում եմ, որ սա ուղղակի միջամտություն էր դատավորի իմ գործունեությանը, ընդ որում՝ բիրտ»,- ՔԿՀ-ից դուրս գալուց հետո լրագրողներին ասաց Բորիս Բախշիյանը։

Ինչ վերաբերում է իր կողմից կայացված դատական ակտին, որի համար այժմ դատավորի նկատմամբ հետապնդում է իրականացվում, Բ.Բախշիյանը նշեց, որ իր կողմից կայացված դատական ակտում  մանրամասն հիմնավորումներ է ներկայացրել, այժմ էլ պնդում է՝ իր կայացրած դատական ակտն օրինական է, արդարացի, հիմնավոր։

Հիշեցնենք՝ փետրվարի 7-ին Երևան քաղաքի ընդհանուր իրավասության դատարանը, նախագահությամբ դատավոր Դավիթ Արղամանյանի, որոշում էր  կայացրել կալանավորել Սյունիքի մարզի ընդհանուր իրավասության դատարանի դատավոր Բորիս Բախշիյանին։ Նա մեղադրվում է անձին ակնհայտ ապօրինի կալանավորելու համար, որն առաջացրել է ծանր հետևանքներ:

Բորիս Բախշիյանն այն դատավորն է, ում որոշմամբ փոխվել էր «Սիսական» ջոկատի հրամանատար Աշոտ Մինասյանի՝ Աշոտ Երկաթի խափանման միջոց կալանքը, և  նա ազատ էր արձակվել գրավի դիմաց։ Նրա որոշումներով  գրավի դիմաց ազատ էին արձակել նաև Քաջարանի համայնքապետ Մանվել Փարամազյանը, Գորիսի փոխքաղաքապետ Մենուա Հովսեփյանը։

Լրագրողների հետ զրույցում դատավոր Բախշիյանն ասել էր. «Ես կարծում եմ, որ իմ նկատմամբ այժմ իրականացվող գործընթացները զուտ, բացառապես, ուղիղ միջամտություն է իմ՝  որպես դատավորի լիազորությունների իրականացմանը»։