Ձեր վստահելի աղբյուրը

«Ամեն անգամվա մեր երթերն ինչ-որ բացահայտում են անում, երեկվա երթում էլ իմացանք, թե ինչ ընտանիքում և միջավայրում է մեծացել այն մարդը, որը գլխավորում է Ազգային Ժողովը»,- Ֆրանսիայի հրապարակում իր ելույթում ասաց Լեհաստանում ՀՀ նախկին դեպսան Էդգար Ղազարյանը, որի խոսքերից հետո հրապարակում հավաքվածները սկսեցին գոռալ «Ամոթ, ամոթ»։

Նրա խոսքով՝ իրենցից շատերին անհիմն մեղադրանքներ են ներկայացնում, թե իբր վիրավորում են պաշտոնյաներին, մարդկանց, բայց այդ հրապարակային, ակնհայտ ենթադրյալ խուլիգանության և ծանր վիրավորանքի հատկանիշներ պարունակող արարքը եղել է տեսանելի ողջ հանրության համար։

Էդգար Ղազարյանը տեղեկացրեց, որ այդ դեպքի մասով նախատեսել են ստորագրահավաք  և այն քաղաքացիները, որոնք ցանկանում են, կարող են միանան հանցագործության մասին հաղորդմանը, որպեսզի վաղն այն հանձնեն ոստիկանություն՝ պատասխանատվության ենթարկելու հայ ժողովրդին և իրենց նվիրական պայքարի համար դուրս եկած մարդկանց վիրավորելու համարձակություն ունեցողին:

Նա նաև տեղեկացրեց, որ մի քանի օր առաջ ընկերների հետ ձեռնարկել էին ուսապարկերի ակցիա, ձեռք էին բերել պատգամավորների թվով ուսապարկեր, որոնցից յուրաքանչյուրի վրա փակցված էր ՔՊ-ական պատգամավորներից մեկի լուսանկարը։

«Ինչո՞ւ որոշեցինք նրանց ուսապարկ նվիրել, որպեսզի իրենց հուշենք՝ մարդ եք, մարդ եղեք, հերիք է ուսապարկ մնաք, դարձեք ուսապարկ կրող, այլ ոչ թե ուսապարկ։ Ոստիկանությունը խափանեց մեր այս ազնիվ ձեռնարկը, մեզ նույնիսկ ասացին, որ պետք է բերման ենթարկեն, քանի որ աղտոտում ենք մեր քաղաքը։ Այսինքն՝ նրանց կարծիքով պատգամավորների նկարները աղբ են, բայց մենք այսպես չէինք մտածում։ Մենք նրանց նկարները փակցրել էինք ուսապարկերի վրա, որ նրանց նվիրելուց յուրաքանչյորն իմանա, թե որն է իր նվերը։

Ենթադրենք՝ Լուլուն չվերցնի աներձագի ուսապարկը, Լենա Նազարյանն՝ ամուսնու ուսապարկը։ Բայց հերիք չի խափանեցին, հետն էլ պարզեցին, որ մենք հանցագործ ենք։ Հիմա քրեական գործ են հարուցել և մեզ ուզում են մեղադրել ծանր վիրավորանք հասցնելու համար։

Նիկոլ Փաշինյանն ուզում է ինձ և իմ մտավորական ընկերներին, որոնք դուրս են եկել հայրնեիքը նրա ճանկերից փրկելու ազնիվ գործի համար, հանցագործ դարձնել։ Ե՞ս եմ հանցագործ, այ հայրենիքի գող, դու գողացել ես մեզնից մեր հայրենիքը, մեր երազանքները, մեր ապրած կյանքը, մեր դրած ջանքերը, մեր երեխաների ապագան և դու ուզում ես մեզ հանցագործ անվանել։

Դու վախեցիր քո պատժից, այն պատժից, որ ստանալու ես խաղաղ բանակցությունը պատերազմի վերածելու համար, պատերազմը տանուլ տալու համար, պատերազմը դադարեցնելու առաջարկը չընդունելու համար, ականապատ դաշտերի քարտեզները թշնամուն փոխանցելու համար։ Սա դեռ մեր իմացածն է»,- ասաց նա։ 

Էդգար Ղազարյանի խոսքով՝ Փաշինյանն այսօր ուզում է բերման ենթարկել այն ազնիվ երիտասարդներին, որոնք Երևանում փողոց են փակում, ոստիկանության անհամաչափ գործողություններով փորձում է ցրել այն մարդկանց, որոնք փողոց են փակում։

«Ուզում ես բացել Երևանի փողոցնե՞րը, գնա բացիր Գորիս-Կապան, Կապան-Ճակատեն, Վարդենիս-Սոթք-Քարվաճառ, Ստեփանակերտ-Հադրութ, Բերձոր-Շուշի ճանապարհը։ Դու չես հասկանում, որ մենք այս ճանապարհները փակում ենք՝ մեր հայրենիքի ճանապարհները բացելու համար։ Մենք կդադարեցնենք բոլոր գործողությունները, եթե դու վաղը քո թիկնազորով, այս հազարավոր ոստիկաններով, քո աջակիցներով գնաս Շուշի։ Կարո՞ղ ես գնալ»,- նշեց նա։