Ձեր վստահելի աղբյուրը

Նիկոլ Փաշինյանի հրաժարականի պահանջով, Հայաստանի ու Արցախի անվտանգությամբ մտահոգ քաղաքացիների բողոքի ակցիաները, հանրահավաքները վաղը կշարունակվեն ինչպես Երևանում, այնպես էլ մարզերում։

«Մայիսի 8-ին ժամը 9։30-ին ավտոերթով շարժվում ենք դեպի Գյումրի։ Այնտեղ ժամը 13։00-ին տեղի կունենա հանրահավաք, այն քաղաքացիները, ովքեր ուզում են միանալ, խնդրեմ»,- Ֆրանսիայի հրապարակում հայտարարեց ՀՅԴ ԳՄ ներկայացուցիչ Իշխան Սաղաթելյանը։

Նա հայտարարեց, որ վաղը ժամը 17։00-ին այս հրապարակում տիրելու է Արցախի շունչը. արցախցիներն այստեղ Արցախի ավանդույթներով կազմակերպելու են  մշակութային միջոցառումներ և բոլորին հրավիրում են։

«Վաղը մեծ հանրահավաք չենք ունենք, քանի որ հաջորդ օրը՝  մայիսի 9-ին, Շուշիի ազատագրության օրն է։ Մայիսի 9-ին ժամը 17։00-ին  Ֆրանսիայի հրապարակում հրավիրում ենք հանրահավաք»,- ասաց Սաղաթելյանը։

Նա հայտնեց, որ վաղն իրենք պետք է ունենան աշխատանքային օր՝  վերակազմակերպելու իրենց աշխատանքները, ամբողջացնելու ծրագրերը։

«Մենք կազմակերպված գնում ենք առաջ, ամեն ինչ լավ է  լինելու, հետ քայլ չկա, նահանջ չկա, գնալու ենք մինչև վերջ», -իր ելույթում ասաց ՀՅԴ ԳՄ ներկայացուցիչը։

Ի. Սաղաթելյանն անդրադարձավ Գերմանիայի Քյոլնի քաղաքային իշխանության որոշմանը՝ ապամոնտաժել քաղաքում գտնվող Հայոց ցեղասպանության զոհերի հիշատակը հավերժացնող հուշակոթողը։

«Սա պատճառ է այս իշխանությունների վարած քաղաքականության. այն իշխանությունը, որ սիրախաղ է սկսել Թուրքիայի հետ, ով հրաժարվել է  մեր անժամանցելի իրավունքների  պաշտպանությունից, պատասխանը սա է լինելու։ Սա մի հանցավոր գործընթաց է, որ սրանց մնալու պարագայում շարունակվելու է։ 100 տարուց ավելի մեր ժողովուրդը զրկանքների, պայքարի, համահայկական  պահանջատիրության գնով Ցեղասպանության միջազգային ճանաչման երթը շարունակել է ամբողջ աշխարհում։ Բազմաթիվ պետություններ ճանաչել են Հայոց ցեղասպանությունը, դատապարտել, բայց այսօրվա իշխանության քաղաքականության արդյունքում աշխարհում սկսվում է մի պրոցես, որը պետք է կանխել։ Մեկ անգամ ևս այս հրապարակից ի լուրջ ամբողջ աշխարհի ասենք՝ օրվա իշխանությունը չի արտահայտում հայ ժողովրդի կամքը։ Հայ ժողովրդի կամքը, դիրքորոշումը այստեղ է, Ցեղասպանության միջազգային ճանաչումը, դատապարտումն այլընտրանք չունի»։

Նա նշեց, որ մարզերում բնակիչների հետ հանդիպմանը հիմնական խնդիրը, որի մասին արտահայտվում էին՝ համայնքների խոշորացումն է, ասում են՝ դա տեղի է ունեցել ապօրինի, հաշվի չի առնվել ազգաբնակչության կարծիքը. «Ձեր այս պահանջն ընդունում ենք ու հայտարարում, որ սրանց դուրս վռնդելուց հետո ամբողջությամբ կվերանայենք համայքների խոշորացման գործընթացը»։

Սաղաթելյանն ասաց, որ ամուր պետություն ունենալու համար պետք է ունենալ ամուր պետական կառավարման համակարգ, ամուր հասարակություն ունենալու համար պետք է պահպանել ազգային ինքնությունը, մշակույթը, պատմությունն ու եկեղեցին։

«Սրանցով դա հնարավոր չէ, հենց այդ պատճառով սրանց պետք է հեռացնենք»,- ընդգծեց ընդդիմադիր գործիչը։

Նա նշեց, որ իրենք պայքարում են նաև երկրի անվտանգության համար, իսկ դրա համար անհրաժեշտ է  ամուր բանակ, անվտանգության կառավարման համակարգ, անվտանգության ամբողջական համակարգ, անհրաժեշտ է ամուր տնտեսություն ունենալ։

«Հանուն ամուր պետության, հասարակության, ուժեղ տնտեսության և անվտանգության՝ սրանց պետք է հեռացնենք»,- ասաց Իշխան Սաղաթելյանը։