Ձեր վստահելի աղբյուրը

«Դեռևս  դեկտեմբերին վանաձորցիների 80 տոկոսը մերժել է այս իշխանություններին»,- Վանաձորում հանրահավաքի ժամանակ ասաց Վանաձորի ավագանու անդամ Վահե Դոխոյանը։

Նա տեղեկացրեց, որ իրենց գործընկերներից երկու հոգու երկու օր առաջ աշխատանքից ազատել են հետևյալ պատճառաբանությամբ՝ «համայնքային ծառայողը ֆեյսբուքյան իր էջում կիսումներ կատարելու համար հեռացվում է աշխատանքից»։

«Սա մեջբերում էր հրամանից։ Հասկանո՞ւմ եք՝ ուր ենք հասել»,- ասաց Դոխոյանը, որից հետո հրապարակը վանկարկեց՝ «ամոթ», «ամոթ»։

Նրա խոսքով, ամեն ինչ կախված է ժողովրդից։

«Ժողովուրդը մեզ ասում է թարգեք աթոռակռիվը, լիդերության հարցը, միասնական եղեք։ Հիմա համոզո՞ւմ եք, որ միասնական ենք, մեր մեջ չկա լիդեր, բոլորդ լիդեր եք, լիդերը հայ ժողովուրդն է»,- նշեց Վանաձորի ավագանու անդամը։

Նա ընդգծեց, որ շատ կարճ է մնացել հաջողության հասնելու համար. «Հայրենիքի համար պայքարը մեկ օրով չի լինելու, հայրենիքի համար պայքարելուց  հոգնել չկա։ Զինվում ենք համբերությամբ և այս հրապարակում միասին ասում ենք՝ լոռեցին թասիբ ունի»։

Վահե Դոխոյանը վստահեցրեց, որ շատ կարճ ժամանակ անց վանաձորցին ապրելու է իրեն վայել քաղաքում, հայն ապրելու է անվտանգ Հայաստանում, արցախցին ունեցալու է Արցախ և մենք Արցախ չենք գնալու տուրիստի կարգավիճակով։