Ձեր վստահելի աղբյուրը

«Այս 4 տաիների ընթացքում զանգվածային անջրպետներով Հայաստանը բաժանված է հատվածների: Մեկը մյուսի հետ թշնամանք ու լարվածություն ունի, ինչի ապացույցն այսօր ճանապարհի կազմակերպածն էր»,-Գյումրիում կազմակերպած հանրահավաքի ժամանակ  ասաց գյումրեցի քանդակագործ Արտյուշ Գևորգյանը, և հավելեց. «Բայց այս չորս տարիների ընթացքում, լինելով դեմ այս իշխանությանը և իր արածներին, մեր խաչի ծերից չկտրեցինք, որ այդ անդունդն անցնենք և բոլորին հրավիրենք մարդկային զրույցի, որպեսզի պատերի տարբեր անկյուններից չգոռան և տարբեր տեսակի ժեստեր չանեն պայքարողների ուղղությամբ»:

Հայտնելով, որ չի ուզում  խոսել «Դիմադրության» շարժման շարասյան ճանապարհը փակած կանանց ցույց տված ժեստերին և հայհոյանքներին՝ քանդակագործը ցանկություն հայտնեց գնահատել նախորդ օրը տեղի ունեցած կանանց երթը:

«Կանանց երթը մայրության, զսպվածության, գեղեցիկի, հոգու ու ներաշխարհի քայլ էր ընդդեմ իշխանության»,-հայտարարեց Արտյուշ Գևորգյանը:

Քանդակագործի խոսքերով՝ Գյումրու Թատերական հրապարակ են եկել կայացած, ինտելեկտուալ մարդիկ, քանի որ իրենց ապրած 34 տարվա կյանքը, իրենց երիտասարդությունը,որ եղել է հանուն Արցախի, սուտ լինել չի կարող, որովհետև Նիկոլը չի կարող Արցախը միացնել Ադրբեջանին, որովհետև իրենց երեխաները պայքարել և պայքարելու են դրա համար:

Հայտարարելով, որ սկսվածը գաղափարի, տեսակի կռիվ է, ոչ թե անձերի և կուսակցությունների պայքար՝ Գևորգյանն ասաց. «Սա ոտքերի վրա կանգնած մարդու կռիվ է, սա սոցիալական կռիվ չէ, մենք 34 տարի նեղության մեջ հանուն Արցախի ապրել ենք, երեխաներ ունեցել և պատրաստ ենք ևս 30 տարի սպասել, թեպետ կուզեի, որ Աստծո ժամացույցով շուտ գար այդ օրը, բայց երբեք չենք համաձայնի Արցախը թողնել թշնամուն:

Մտեք ամեն հայի տուն և կտեսնեք, որ յուրաքանչյուր ընտանիքում կա բարձր գոռոց կատարվողի վերաբերյալ: Մեծամասնությունը ուղղակի չգիտեն պայքարի այն հունարները, որ իշխանությունները գիտեին՝ 4 տարի առաջ զանգվածային անկարգություներ հրահրելով:

Բայց մենք իրենց զենքերով և մեր պարզ մաքուր ոգեղեն ցանկություններով ենք պայքարելու իշխանության դեմ»:

Նա գյումերցիներն կոչ արեց տեր կանգնել իրենց երկրին, որի մասնիկն են: