Ձեր վստահելի աղբյուրը

«Մենք Երևանում և մարզերում մեկ շաբաթ է իրականացնում ենք տարբեր ակցիաներ և դուք նկատել եք, որ բավականին լուրջ քանակությամբ մասնակիցներ են հավաքվում»,-«Մայր Հայաստան» հուշարձանի մոտ լրագրողների հետ զրույցում նշեց «Հայաստան» խմբակցության ղեկավար Սեյրան Օհանյանը:

Նա հայտնեց, որ  ամեն օր  բողոքի միջոցառումներից հետո «Դիմադրության» շարժման կազմակերպիչները նստում, վերլուծում և ամփոփոմ են արդյունքները, նշում դրականը և նաև բացթողումները:

«Կարծում եմ՝ այս թափանիվը շարժվում է առաջ, մեր համակիրների թիվն ավելի է մեծանում:Սա մեկ անձի շարժում չէ, նախկին իշխանությունները, նախկին նախագահներն ամեն ինչ արել են, որ մենք արժեքներ ձեռք բերենք: Մենք ձեռք ենք բերել անկախություն, ձեռք ենք բերել ինքնիշխանություն, այդ տարիներին կանոնավոր բանակ է ձևավորվել, հաղթել ենք Արցախում: Արցախն ու Հայաստանը եղել են մեկ կուռ անվտանգային համակարգ: Այս իշխանությունները, 2018-ին գալով իշխանության, իրենք իրենց որոշումներն իրականացրել են իրավիճակի ոչ սթափ գնահատման և ոչ սթափ կանխազգացումի արդյունքում: Ամեն ինչ արել են, որ բանակցային գործընթացը չլինի: Իսկ այնտեղ, որտեղ վերջանում են բանակցությունները, սկսվում են մարտական գործողություններ»,-հայտարարեց Օհանյանը:

FreeNews.am կայքի լրագրողը միջամտեց՝ ասելով, որ Սերժ Սարգսյանն է ԱԺ-ում ժամանակին հայտարարել, որ բանակցային գործընթացը տապալվել է:

«Սերժ Սարգսյանի օրոք բանակցային գործընթացը չի տապալվել, եղել են տարբեր փաստաթղթեր և՝ տարբեր ատյաններում, դրանք ուղղված են եղել միայն ու միայն Արցախի ինքնորոշումն առաջ տանելու: Այդ բանակցային գործընթացն է թույլ տվել, որ Արցախի ու Հայաստանի նկատմամբ լայնածաված գործողություններ չլինեն: Այսօրվա իշխանություններն են, որ իրավիճակի ոչ սթափ գնահատմամբ բերել են նոր պատերազմի: Նրանք պատերազմի ողջ ընթացքում խրախուսել են նահանջը՝ Նիկոլ Փաշինյանն անձամբ, 4-րդ նախագահն անձամբ, իրենց ձեռքով, չտիրապետելով իրավիճակին, տվել են տարբեր կոչումներ»:

FreeNews.am կայքի լրագրողը հարցրեց, թե ինչ է արել Սեյրան Օհանյանը բանակն ուժեղացնելու համար, ինչին ի պատասխան պաշտպանության նախկին նախարարը հայտնեց, որ ՀՀ բանակը շարունակաբար զարգացել է բոլոր փուլերում, իսկ ինքը ՀՀ ԶՈՒ զարգացման երկու 5-ամյա ծրագիր է մշակել և իրականացրել:

Նույն լրատվական գործակալության ներկայացուցիչը հարցրեց, թե Օհանյանը ի՞նչ գումարներով է գնել «Վահագնի» թաղամասի իր դղյակը:

Օհանյանը հայտարարեց, որ ինքը դղյակ չունի, իսկ նման հարցերը պետք է ուղղել ՀՀ իրավական համակարգի պատասխանատուներին, եթե իրավական խնդիրներ կան, ապա նրանք վաղուց պետք է պարզած լինեին:

Լրագրողը մի քանի անգամ կրկնեց Մոնումենտի դղյակների պատկանելիության մասին հարցը:

«Լսի՝, ես Գագիկ Ջհանգիրյա՞նն եմ քեզ համար, գնացեք Գագիկից հարցրեք»,-պատասխանեց Օհանյանը և հայտնեց, որ շտապում է միջոցառման: