Ձեր վստահելի աղբյուրը

«Համաշխարհային պատմության մեջ նման ֆանտաստիկ դեպքեր քիչ են լինում, երբ պատերազմից հետո ծնկի եկած իշխանության պարագայում նման ընկճված, ծանր կորուստներ կրած ազգը ոտքի է կանգնում։  Մեկ շաբաթում մենք կարողացանք մեր ազգին ոտքի հանել։ Դա այլևս փաստ է, դա այլևս իրականություն է»,- Ֆրանսիայի հրապարակում հանրահավաքի ժամանակ ասաց ՀՅԴ ԳՄ ներկայացուցիչ Իշխան Սաղաթելյանը։

Նա դիմեց Նիկոլ Փաշինյանին՝ ասելով. «Ուրեմն Նիկոլ, դու ոչ միայն Ալիևին ես պատվել, դու նաև պարտվել ես սեփական ժողովրդին, այն ժողովրդին, ով քեզ 4 տարի առաջ այս օրերին բերեց իշխանության, բայց դու այդ ժողովրդին բերեցիր պատերազմ, մահ, զոհ, հայրենիքի կորուստ, հիմա այդ ժողովուրդը ոտքի կանգնեց և ասում է՝ Նիկոլ գնա, պարզապես հեռացիր»։

Սաղաթելյանը նշեց, որ քաղաքացիների այսօրվա մասնակցությունը, վճռականությունը, բազմահազարանոց երթն իրեն իրավունք է տալիս՝ «այս հրապարակից ձեր անունից հայտարարել՝ Նիկոլ, կամ դու արագ, անցնցում հրաժարական ես տալիս, կամ մենք երկիրը կանգնեցնում ենք»։

Ըստ նրա, ակհնայտ փաստ է, Նիկոլ Փաշինյանն այլևս Հայաստանում իշխանություն չունի, իրենց հետևողական քայլերի արդյունքում, համախմբածության, ճիշտ գործողությունների, քայլերի արդյունքում իրենց պայքարը րոպե-րոպե թափ է հավաքում։

«Ի՞նչ պետք է անենք։ Պետական կառավարման համակարգը պետք է կանգնեցնենք։ Իշխանությանը հեռացնելու մի ճանապարհ գոյություն ունի՝ գործնականորեն փաստենք, որ իշխանությունը փողոցում է, մենք ենք որոշում, աթոռներին նստածներն  այլևս ի վիճակի չեն մեր երկրում որևէ բան որոշել։

Դրա համար պետք է ավելի լայն տարածումով շարունակենք մեր բողոքի, անհնազանդության ակցիաները»,- ասաց ընդդիմադիր գործիչը։

Նա ներկայացրեց վաղվա անելիքները. «Վաղը շատ կարևոր օր է մեր բոլորի համար։ Եթե այնքան մարդ, որքան մասնակցեց երթին, վաղը դուրս գա փողոց կոնկրետ անհնազանդության գործողություններ, ակցիաներ անելու, վստահեցնում եմ ձեզ՝ հաշված օրերի ընթացքում հեռացնելու ենք։

Վաղը հայտարարում ենք դասադուլ, գործադուլ, յուրանքարյուրդ ձեր հետ փողոց եք բերում ևս մեկ քաղաքացի։ Եթե մենք վաղն այդքանով սկսենք, ամբողջ Երևանում մեր անհնազանդության ակցիաներն, անհրաժեշտության դեպքում շրջափակենք պետական կառավարական շենքերը, մենք վերջնականապես ծնկի ենք բերելու։

Բանաձևը շատ պարզ է՝ անհնազանդության ակցիաներով, քայլերով, գործողություններով ամբողջ իշխանությունը վերցնում ենք մեր ձեռքը ու կանգնեցնում երկիրը, Նիկոլի ամեն օր ավելի մնալը, պետք է բոլորը հասկանան, որ չի բխում մեր երկրի շահերից ու միանալ մեզ»։

Նա վստահեցրեց, որ ճանապարհ փակելը, անհնազանդության ակցիաները, պետական կառավարման համակարգը կանգնեցնելն ինքնանպատակ չէ, միակ ճանապարհը դա է, այլ հեծանիվ հորինել պետք չէ։

«Կրկնապատկենք մեր թիվը, անհնազանդության ակցիաներով կանգնեցնենք պետական կառավարման համակարգը, որպեսզի ուժայինները զեկուցեն՝ Նիկոլ, դու այլևս իշխանություն չունես և ժողովրդի ցասումը հնարավոր չէ կանգնցնել։ Սա է բանաձևը։

Հոգնել չկա, հետ քայլ չկա, նահանջ չկա, մինչև վերջ»,- հայտարարեց Իշխան Սաղաթելյանը։

Նա տեղեկացրեց, որ վաղը  ժամը 12-ին, 4 ուղղություններով սկսում են անհնազանդության երթեր և ակցիաներ, այդ երթերի ընթացքում արգելափակվելու են ճանապարհները։

«Մի երթը Գայի պողոտա՝ Մեգամոլի դիմաց, երկրորդը՝ Րաֆֆու փողոց՝ Անդրանիկի արձանի դիմաց, երրորդը՝ 15 թաղամաս՝ Չաուշի արձանի մոտից, 4-րդը՝ Սասունցի Դավիթ արձանի մոտի: Այդ կետերից շարժվում ենք և ամբողջությամբ պարալիզացնում քաղաքը»,- հայտնեց Սաղաթելյանը։

Նա դիմեց քաղաքացիներին՝ ամեն մեկը նախաձեռնի, դրսևորի իր բողոքը յուրովի։

«Վաղն առավոտից սկսում ենք, իսկ ժամը 19։00-ին հավաքվում ենք Ֆրանսիայի հրապարակում՝ ամփոփելու մեր աշխատանքը»,- ասաց Իշխան Սաղաթելյանը։