Ձեր վստահելի աղբյուրը

«Տարիներ առաջ իրականացված  «Հարսանիք լեռներում» օպերացիան՝ Շուշիի ազատագրմամբ պատմական էր մեր համար, որովհետև այն ևս մեկ անգամ ցույց տվեց, որ հայ ժողովրդի ոգին անկոտրուն է»,-Մայր Հայաստանի հուշարձանի մոտ հայտարարեց «Հայաստան» խմբակցության ղեկավար, ՊՆ նախկին նախարար Սեյրան Օհանյանը և շնորհավորեց ողջ ժողովրդին, կամավորներին, երկրապահներին, ՀՀ ԶՈՒ և ԱՀ ՊԲ ողջ անձնակազմին Մայիսի 9-ի կապակցությամբ:

Նա հիշեցրեց, որ հայկական հինավորց քաղաքի՝ Շուշիի գրավմամբ նաև ցամաքային կապ ստեղծվեց Արցախի և Հայաստանի միջև:

«Այն նաև ռազմական առումով մեծ նշանակություն ունեցող օպերացիա էր, որը թեկուզ իրականացվեց կամավորների միջոցով, բայց ռազմական գիտության կանոնների համաձայն՝ սկսած հետախուզությունով, վերջացրած գործողություններով»,-հայտնեց պաշտպանության նախկին նախարարը՝ արձանագրելով, որ 30 տարի առաջ այս օրերին կար ռազմական համապատասխան գիտելիքներ և կադրային սպաների բազան:

Նկատելով, որ Շուշիի ազատագրումը հիմք հանդիսացավ համաշխարհային ոգևորության և հետագա հաղթանակների համար՝ նա հայտնեց, որ այն նպաստեց  Հայաստանի և Արցախի բոլոր ոլորտների միացմանը և փոխինտեգրմանը:

«44-օրյա պատերազմից հետո կարծես թե այդ Եռատոնը խլեցին մեզանից: Բայց այս ամենից պետք է հետևություն անել և դասեր քաղել: Վերջին պատերազմի ընթացքում եղել են հերոսություններ և քաջագործություններ, բայց պետք է նաև դասեր քաղել: Նախ այն, որ պետական կառավարման համակարգը  չի կարողացել պետությունը փոխանցել ռազմական ռելսերի վրա: Օրենսդիր իշխանությունը չի կարողացել համախմբվել և վերահսկողություն իրականացնել: Պետական կառավարման համկարգերը չեն կարողացել համախմբել մեր ներուժը, թե՛ մարդկային ռեսուրսների, թե՛ այլ առումով»,-հայտարարեց Սեյրան Օհանյանը:

Նրա խոսքով դատաիրավական համակարգում էլ է թերություններ եղել, բացակայել է կարգ ու կանոն հաստատելու վճռականությունը:

«Հետագայի համար մեր ողջ ժողովուրդը պետք է դասեր քաղի, եթե այսօրվա իշխանությունները չեն ցանկանում դրանից դասեր քաղել, ապա ժողովուրդն իր համախմբվածությամբ պետք է ստիպի իշխանություններին, իսկ եթե իրենք այն չեն ցանկանում, ապա պետք է հեռացնի այս իշխանություններին: Մեր դիմադրության շարժումն այս Եռատոնը, նախկին հաղթանակների ոգին վերականգնելու  համար է: Մեր ամբողջ պատմության ընթացքում մեզ միշտ հարվածել են և  դրանից մենք գոտեպնդված ենք դուրս եկալ: Այսօր էլ գոտեպնդված ենք: Այսօր այս դիմադրության շարժմամբ վերականգնում ենք, բարձրացնում ենք պետության ոգին, ոչ միայն երկրի ներսում, այլև նրա սահմաններից դուրս՝ մեր արժանապատվությունը պահելու համար»,-հայտարարեց «Հայաստան» խմբակցության ղեկավարը և հավելեց. «Այս շարժման բեկումնային պահն արդեն անցել է, մնում է միայն հանրային ճնշումը ուժեղացնենք և ստիպենք այս իշխանություններին հեռանալ, քանի որ նրանց գործողությունները գտնվում են մեր թշնամիների ճնշման տակ: Իզուր չէ համաշխարհային պատմությունը փաստում, որ պարտված իշխանությունները պետք է հեռանան: Այս իշխանութունները ոչ մի դաս չեն քաղել, իրենք շարունակում են պարտությունների շարանը փաթաթել հայ ժողովրդի վզին, շարունակում են պնդել, որ գնալու են խաղաղության մեր հարևանների հետ, որոնք այնուամենայնիվ, չեն ուզում մեր հետ հարևան լինել, այլ ցանկանում են մնալ հակառակորդ՝ իրենց հայատյացությամբ և ռազմական հռետորաբանությամբ»:

Պաշտպանության նախկին նախարարը համոզմունք հայտնեց, որ միասնաբար հնարվոր է վերագտնել երբեմնի հաջողությունները և վերականգնել հաղթողի ոգին: