Ձեր վստահելի աղբյուրը

«Մենք պատերազմից հետո անընդհատ փորձում ենք մեր հանրությանը հասցնել, որ այս իրավիճակում  իրականում օրակարգը ոչ թե խաղաղությունն է, այլ Հայաստանի համար նոր զիջումների օրակարգը»,- քայլերթի  ժամանակ լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը՝ խոսելով  Ադրբեջանի փոխարտգործնախարար Խալաֆ Խալաֆովը հայտարարության մասին, որ  որ ՀՀ իշխանությունը Բրյուսելում համաձայնել է սկսել  խաղաղության պայմանագրի ստորագրումը, որի շրջանակներում նախատեսվում է այսպես կոչված «Ղազախի շրջանի 7 գյուղերի և Քյարքիի» հանձնում Ադրբեջանին։

Աբրահամյանի խոսքով, իշխանությունը փորձում է ցույց տալ, որ ամեն ինչ անում է  կանխելու  պատերազմը, բայց իրականության մեջ իշխանությունը մտել է հանձնման օրակարգի մեջ, ինչը ինչ-որ փուլում բերելու է նաև նոր պատերազմի։

«Մենք գալիս ենք մեր հասարակությանը իրական խաղաղություն բերելու, քանի որ այն օրակարգը, որն այսօր քննարկվում է Ադրբեջանի հետ, երբեք մեզ խաղաղություն չի բերելու, մաս առ մաս բերելու է Հայաստանի  և Արցախի հանձնմանը։

Մենք շատ ենք խոսում Արցախի մասին, բայց մեր պայքարը ոչ միայն  Արցախի, նաև Հայաստանի համար է, որովհետև այն նախապայմանները, որոնք առաջ է քաշում Ադրբեջանը, իրականում ոչ միայն  Արցախի հանձնման, այլև Հայաստանի հանձնման մասին է, ինչի մասին շատ բաց տեքստով խոսում է Ադրբեջանի նախագահը, տարբեր պաշտոնատար անձիք»,- ասաց Տիգրան Աբրահամյանը։

Նա նշեց, որ իրենք պետք է գան կանխելու Հայաստանի ու Արցախի հանձնման այս ծրագիրը։

«Այն հանգամանքը,  որ իշխանությունը գնում է քննարկելու, թե մեր որ տարածքները պետք է հանձնի Ադրբեջանին, արդեն իսկ խոսում է այն մասին, որ այս իշխանությունը  չունի այլ օրակարգ, քան Հայաստանը աստիճանաբար հանձնելու գործընթացն է։ Իշխանությունն այդ ճանապարհի վրա է, օր առաջ պետք է կանխել, այլ տարբերակ չկա»,- ասաց ընդդիմադիր պատգամավոր Տիգրան Աբրահամյանը։