Ձեր վստահելի աղբյուրը

 «Մինչև նոյեմբերի 9-ի կապտուլյացիան բոլորիս համար գուցե  գաղտնիք չէր, զրկվել ենք մեր ինքնիշխանությունից։ Բայց, հասկանում եք, ինքնիշխանությունից կարելի է զրկվել միայն այն դեպքում, եթե կորցնում կամ ուրանում ենք մեր ինքնությունը։ Հենց այդ պահից պարզ դարձավ, որ Նիկոլն ինքնություն չունի։ Հասկանում եք, Նիկոլը հենց էն մարդն է, որը ինքնություն չուներ։ Իր, այսպես կոչված, հաղթանակի գրավականը կայանում էր նրանում, որ ինքը զուրկ էր ինքնությունից։ Հետևաբար , իր բերած իշխանությունն էլ եղավ իր նման ինքնությունից զուրկ, անդեմ, ոչնչի մասին ոչինչ չասող»,- Ֆրանսիայի հրապարակում հանրահավաքի ընթացքում ասաց ԵՊՄՀ դասախոս Լևոն Նազարյանը։

Նրա խոսքով՝ պայքարելով Նիկոլի դեմ, պայքարում են անինքնության և ազգային ինքնության վերակենդանացման համար։

Անդրադառնալով պարբերաբար հնչող հարցին, թե ինչ ծրագիր ունեն  կամ  ի վերջո ինչպես է լուծվելու Արցախի հարցը, դասախոսը պատասխանեց․

«Արցախի հարցը լուծվելու է այն ժամանակ, երբ մենք կարողանանք ձևավորել այնպիսի Կառավարություն, որը առաջ կտանի մեր ինքնության շահերը։ Չի կարող լինել ինքնորոշում առանց ինքնության։ Չի կարող Արցախի ժողովուրդը պնդի, որ ինքն ունի ինքնորոշման իրավունք և այդ իրավունքը պետք է իրացնի, եթե այստեղ նստած  էս խմբակը  չի հասկանում,թե ինչ է ինքնությունը։ Մեր թշնամիներն ու հակառակորդները մեզ չեն հարգելու մինչև մեր ինքնությունը չվերականգնենք»։

Նազարյանի կարծիքով՝ ինքնությունը վերականգնելու համար նախ պետք է հասկանալ,թե ինչպես այդ ինքնությունը «ոտնատակ»  եղավ։

«Ըստ իս, ինքնությունը ոտնատակ եղավ այն ժամանակ, երբ այս կապիտուլյանտ  իշխանությունը խաչակրաց արշավանք հայտարարեց ու մինչև հիմա  վարում է կրթության համակարգի դեմ։ Բազմիցս ասել եմ, որ այն չարաբաստիկ օրը, երբ սրանց կոտրած ձեռքով  Հայոց պատմության դասագրքերի մեջ «Արևմտյան Հայաստանն» անվանեցին «Արևելյան Անատոլիա», այդ օրվանից մեր գլխին գալու էր այս արհավիրքը։ Կոկորդ էինք պատռում,որ այս բուհերի կառավարման խորհուրդներ փոխելով փորձում է դարձնել ՔՊ-ի վարչատարածքային միավորներ, բուհական համակարգը մնալու է թրքահպատակ իշխանության կոշիկների տակ»,- նշեց Նազարյանը։

Դիմելով ուսանողներին, դասախոսն ասաց, որ  ակադեմիական առարկաներ սովորեցնելուց բացի,  գիտելիքներ ստանալուց, կա մի կարևոր օրակարգ ևս՝ մարդ լինելու օրակարգը։

«Ձեզ դաստիրակում էինք, որ կա էլ ավելի կարևոր առաջնահերթություն։ Այն է՝ հայ մնալու առաջնահերթությունն է։ Եթե բուհում «3»-երով, «4»-երով եք սովորել, հասակացեք, կյանքում հնարավոր չի մարդ լինի «3»-ի, հնարավոր չի հայ լինել՝ ձգտելով «4»-ի  կամ կարմիր դիպլոմի։ Հիմա հասկանում եք, ունեք ավելի կարևոր քննություն՝  հայրենիքը պահելու և պետությունը պահելու քննությունը։ Եթե բուհում քննությունը տապալելուց հետո , հնարավոր է լինում բաց դռների օր, ապա այս պայքարը տապալելուց հետո որևէ բան չի լինելու։ Եթե, Աստված մի՛ արասցէ, դուք լիկվիդ մնացիք այս քննությանը, մենք բոլորով ենք լիկվիդացվելու։ Ու այդ լիկվիդացիայից հետո , ձեր ընտրած մասնագիտությունների փոխարեն, գալու է երկու մասնագիտացում՝ կամ սովորելու եք թուրքական բաղադրատոմսով թեյ պատրաստել, կամ ստամբուլյան բարբառով թուրքերի երկարաճիտ կոշիկները մաքրել։ Սիրելի ուսանողնե՛ր, այսօր դուք եք որոշելու, հայ-թուրքական սահմանի հնարավոր բացման դեպքում, այն Թայլաթի, թե՞ Սողոմոն Թեհլերյանի անվամբ է կոչվելու»,- հայտարարեց դասախոսը։