Ձեր վստահելի աղբյուրը

Փաստաբան Տիգրան Աթանեսյանը գրում է.

«ՀՀ գլխավոր դատախազությունը չի հաստատել Արշակ Հակոբյանի վերաբերյալ քրեական գործով մեղադրական եզրակացությունը և գործը վերադարձրել է ՀՀ կոռուպցիոն կոմիտեին՝ լրացուցիչ նախաքննության համար: Քրեական գործը արդեն քննիչի մոտ է:

Պաշտպանության կողմին հայտնի է դարձել նաև, որ հսկող դատախազը իր որոշման մեջ գտել է, որ քրեական գործում իսպառ բացակայում են ապացույցներ այն մասին, որ Ա. Հակոբյանը կարող էր զբաղվել փողերի լվացմամբ:

Կրկնեմ՝ որևէ ապացույց չկա, անգամ «ծուռտիկ-մուռտիկ» մի կեղծ վկայի ցուցմունք:

Այս պնդումը մենք արել ենք դեռևս անցյալ տարի՝ Ա.Հակոբյանին կալանավորելու միջնորդության քննարկման ժամանակ, ինչպես նաև մինչ օրս մեր կողմից ներկայացվող բոլոր դատավարական փաստաթղթերում, և վերջնական համոզվել ենք, երբ ծանոթացման համար ստացանք քրեական գործի ամբողջ նյութերը:

Կոռուպցիոն կոմիտեն անհասկանալի համառությամբ, ես նույնիսկ կասեի անձնական ատելությամբ լցված, ամեն ինչ արել է և անում է, որ Ա.Հակոբյանը մնա կալանքի տակ: Հիմա արդեն վստահաբար կարող ենք պնդել, որ այս ամենի իրական պատճառները և նպատակները որևէ աղերս չունեն թե քրեական գործի հետ, թե իրավաբանական գիտության հետ առհասարակ:

Եթե կոռուպցիոն կոմիտեի հետ ամեն բան պարզ է և արդարության որևէ ակնկալիքներ չկան ու չեն կարող լինել, ապա հարցս, հռետորական, պարզապես ուղղեմ դատավորներ Ա. Շիրոյանին, Ա. Ալեքսանյանին, Կ. Բիշարյանին, Տ. Սիմոնյանին, Ա. Դանիելյանին և Ռ.Մխիթարյանին (չէ, դուք պարզապես տեսեք, թե ովքեր են Ա. Հակոբյանին կալանքի տակ պահել և արդեն ամեն ինչ պետք է որ պարզ լինի)՝ արդյո՞ք այսպիսի ապագա էիք պատկերացնում ձեզ համար, երբ օրինակ ծաղկեփունջով և  ձեր ծնողի ձեռքը բռնած առաջին անգամ գնում էիք առաջին դասարան:

Հ.Գ. Հիշեցնեմ, որ մինչ այս պահը Ա.Հակոբյանը դեռևս անազատության մեջ է»։

Նշենք, որ Արշակ Հակոբյանը եղել է նախկին ոստիկանապետ Վլադիմիր Գասպարյանի թիկնազորի պետը։ Անցած տարվա նոյեմբերին հակակոռուպցիոն կոմիտեում նախապատրաստված նյութերի հիման վրա  ՀՀ քրեական օրենսգրքի 314.3-րդ հոդվածի 2-րդ մասով հարուցվել է քրեական գործ` հայտարարագիր ներկայացնելու պարտականություն ունեցող անձանց կողմից առանձնապես խոշոր չափերով գույքի և եկամուտների հայտարարագրման տվյալները թաքցնելու ենթադրյալ հանցագործության դեպքի առթիվ:

Ըստ քրեական գործի նյութերի` Արշակ Հակոբյանը, 2017 թվականի հուլիսի 1-ի դրությամբ զբաղեցնելով ՀՀ ոստիկանության համապատասխան ստորաբաժանման ղեկավարի պաշտոնը և հանդիսանալով հայտարարատու պաշտոնատար անձ, 2017 թվականին ներկայացրած` պաշտոնը ստանձնելու և նույն թվականի տարեկան հայտարարագրերում, ինչպես նաև 2018 թվականին ներկայացրած` պաշտոնը դադարեցնելու հայտարարագրում առերևույթ թաքցրել է հայտարարագրման ենթակա` սեփականության իրավունքով իրեն պատկանող, առանձնապես խոշոր չափերի` ավելի քան 7 մլն ՀՀ դրամ կադաստրային արժեքով տունը: