Ձեր վստահելի աղբյուրը

Երևանի քաղաքապետի պաշտոնում նշանակված Հրաչյա Սարգսյանի որոշումը  կռիվ է գցել Մազմանյան ու Նորաշեն փողոցների նորակառույց բազմաբնակարան շենքերի բնակիչների ու տարածքում  նոր շենք կառուցելու եկածների միջև։

Մազմանյան 5/9 ու Նորաշեն 4 հասցեներում 12 հարկանի երկու նորակառույց շենք կա։ Հրաչյա Սարգսյանի որոշմամբ, ևս մեկ 12 հարկանի  շենք  պետք է տեղավորել դրանց արանքում՝ Նորաշեն 2 հասցեում։ Կառուցապատողը «Պոդյոմստրոյպրոեկտ» ՍՊԸ-ն է, որին շինթույլտվությունը տրամադրվել մեկ ամիս առաջ։ Փակցված ցուցանակի համաձայն, շինարարությունը պետք է ավարտին հասցնել 33 ամսվա ընթացքում։ Շինաշխատանքները մեկնարկել են։



Հարակից շենքերի բնակիչներն ահանգստացած են։ Նրանք կասկածներ ունեն, որ  երկու շենքերի արանքում  «խցկվելիք» շենքը չի կարող համապատասխանել քաղաքաշինական սահմանված նորմերին,  պահպանված չէ բարձրահարկ շենքերի միջև հեռավորությունը, կառուցվելիք շենքը  խնդիրներ է առաջացնելու լուսավորության, հրդեհային, սեյսմիկ անվտանգության առումով։

Բնակիչները նշում են՝ նորակառույցը փակելու է մի շարք բնակարանների հինգ պատուհաններից չորսը, ինչը խնդիրներ է առաջացնելու լուսավորության, ինչպես նաև հրդեհի դեպքում հրշեջ մեքենաների մուտքի ապահովման գործում։ Հնարավոր երկրաշարժի դեպքում նույնիսկ տարհանման խնդիրներ կարող են առաջանալ, բակում շարժվելու տեղ չի մնացել։

«Արդեն առկա ու կառուցվելիք շենքերի արանքով անգամ մի մանկասայլակ չի անցնի, հետևաբար հրշեջ մեքենա անցնելու մասին խոսք լինել չի կարող»,-Panorama.am-ի հետ զրույցում ասում է շենքի բնակիչներից Արաքս Մամուլյանը։



Նրա խոսքով, շուրջ քսան օր քաղաքացիները պայքարում էին՝ թույլ չտալով կառուցապատողին որևէ քայլ անել։ Բայց օրեր առաջ կառուցապատողը բազմաթիվ տղաների հետ եկել է, կռվով շինհրապարակ սարքել, դրանում ընդգրկել են նաև հարակից շենքերի բակի հատվածը, որտեղ մինչ այդ բնակիչներն իրենց մեքենաներն էին կայանում։

«Մենք փորձեցինք խոչընդոտել։ Զանգեցինք ոստիկանություն, եկան, ասացին, որ իրենք օրինական են գործում։ Ահազանգել ենք  Քաղաքաշինության, տեխնիկական և հրդեհային անվտանգության տեսչական մարմին։ Եկան, նայեցին, հիմա ինչ-որ գործընթաց են սկսել։ Դիմել ենք քաղաքային իշխանությանը, ներկայացուցիչը եկել է, նայել է, գնացել»,-ասաց Մամուլյանը։

Քաղաքաշինության, տեխնիկական և հրդեհային անվտանգության տեսչական մարմնից Panorama.am-ին փոխանցեցին, տեսչական մարմինը Երևանի քաղաքապետարանից գրությամբ պահանջել է քաղաքաշինական փաստաթղթերի ողջ փաթեթը։

«Այսօրվա ընթացքում քաղաքապետարանից փաթեթը կուղարկեն։ Տեսչական մարմնի քաղաքաշինության վարչությունը կուսումնասիրի բոլոր թղթերը, ըստ այդմ կձեռնարկվեն հետագա քայլերը»,-ասաց տեսչական մարմնի իրազեկման, խորհրդատվության և հանրության հետ տարվող աշխատանքների բաժնի պետ Ելենա Զոհրաբյանը։

Բնակիչները պատրաստվում են դիմել վարչական դատարան՝ բողոքարկելու քաղաքապետի որոշումը։

«Չենք պատրաստվում թույլ տալ մեզ հետ վարվել այնպես, ինչպես ուզում են: Օրենքով թույլատրելի և հնարավոր բոլոր միջոցներով պայքարելու ենք»,-ընդգծեց շենքի բնակիչը։

Երևանի քաղաքապետարանի լրատվության վարչության պետի ժամանակվոր պաշտոնակատար Լևոն Սարդարյանը Panorama.am-ի հետ զրույցում ասում է՝ օրենքի հետ կապված խնդիր չկա։

«Կառուցապատողը երաշխավորել է, որ մինչև շինարարության ավարտն այլընտրանքային ճանապարհ է լինելու շտապօգնության, հրշեջ ծառայությունների մեքենաների համար։ Քաղաքապետարանը խնդիր չի գտել, որ հետ կանչի իր այդ որոշումը»,-ասաց Լևոն Սարդարյանը՝ նշելով, որ քաղաքաշինական նորմերը խախտված չեն։

Բնակիչները խնդրի մասին գրավոր դիմում են ներկայացրել նաև ՄԻՊ գրասենյակ։ Խոստացել են զբաղվել։

Panorama.am-ը Քաղաքաշինության կոմիտեից հետաքրքրվել է, թե սահմանված նորմերի համաձայն, ինչքա՞ն պետք է լինի բարձրահարկ շենքերի միջև հեռավորությունը։ Խոստացել են պատասխանել։







Ի դեպ, վերջերս նման խնդրի մասին Panorama.am-ին ահազանգել էին նաև Արգիշտի փողոցի
բնակիչները։

Լուսանկարները խմբագրությանը տրամադրել են բնակիչները։