Ձեր վստահելի աղբյուրը

«Քրեակատարողական օրենսգրքը մոտ 20 տարվա հնություն ունի, և պետք է արդիականացնել մի շարք կարգավորումներ, որոնք տարիների ընթացքում վերանայման կարիք են ունեցել»,-կառավարության նիստում հայտնեց ՀՀ արդարադատության նախարար Կարեն Անդրեասյանը՝ ներկայացնելով  Հայաստանի Հանրապետության քրեակատարողական օրենսգրքի նախագծին հավանություն տալու և անհետաձգելի համարելու մասին օրենքի նախագիծը:

Նրա խոսքով՝ ուղղիչ հիմնարկների տեսակները արհեստականորեն բաժանված են բացի, կիսաբացի, կիսափակի և բուժականի:
 

«Սրա փոխարեն ունենալու ենք անվտանգության 3 գոտի՝ ցածր, միջին և բարձր ռիսկայնության հիմքով: Մարդիկ, որոնք հայտնվելու են քրեակատարողական հիմնարկներում, նրանց բաշխումը լինելու է կատարած հանցանքների հետ կապված, բայց հետագայում նաև վարքագծի հետ կապված լինելու են վերափոխումներ: Սա վերասոցիալականացման առումով շատ ավելի առողջ մոդել է: Սա միջազգային այն մոդելն է, որը ներդրվում է նոր քրեակատարողական օրենսգրքով»,-հայտնեց նախարարը:

Նա կարևորեց այն փոփոխությունն, ըստ որի՝ բուժական ուղղիչ հիմնարկը որպես առանձին տեսակ չի պահպանվելու:

Հիշեցնելով, որ ներկայում գործում է «Դատապարտյալների հիվանդանոց»՝ Անդրեասյանը փաստեց, որ այնտեղ կալանավորների պահման պայմանները լավը չեն, բայց շատերը ցանկանում են այնտեղ տեղափոխվել, քանի որ ավելի ազատ պահման ռեժիմ է գործում:

«Այն ազատազրկվածները, որոնք ուզում են փոքր-ինչ ավելի ազատ վիճակում հայտնվել, նույնիսկ անմխիթար շենքային պայմանների դեպքում, ձգտում են այնտեղ: Դա առաջացնում է որոշակի կոռուպցիոն ռիսկեր: Նոր օրենսգիրքը բերում է նոր տրամաբանություն, որ բուժական հիմնարկն էլ հարմարեցված է ռիսկայնության այս 3 գոտիների հետ կապված»,-ասաց նախարարը:

Ըստ նրա՝ օրենսգիրքը կառուցված է այն տրամաբանության վրա, որ յուրաքանչյուր դատապարտյալի պատժի կրումը պետք է լինի անհատականացված, որը դրական քայլ է ազատազրկված անձանց համար: