Ձեր վստահելի աղբյուրը

Նիկոլ Փաշինյանի հրաժարականը պահանջող և Հայաստանի ու Արցախի անվտանգությամբ մտահող քաղաքացիները  հանրահավաք են իրականացնում Ֆրանսիայի հրապարակում։

Նշենք, որ մինչ հանրահավաքը, քաղաքացիները Ֆրանսիայի հրապարակից երթ իրականացրեցին դեպի՝ Հանրապետության հրապարակ, որտեղ շրջափակեց Կառավարության 3-րդ մասնաշենքը, այնուհետև  շարունակեցին երթը կանգ առնելով ԱԱԾ և Ոստիկանության շենքների մոտ։  Այնտեղ կոչեր հնչեցնելուց  հետո  քաղաքացիները շարունակեցին երթ վերադառնալով Ֆրանսիայի հրապարակ։

ՍԴ աշխատակազմի նախկին ղեկավար Էդգար Ղազարյանը ելույթ ունենալով, իր բնորոշմամբ՝ հայրատնատեր, հայրենասեր, պատվասեր և արժանապատիվ ՀՀ քաղաքացիների առջև , հիշեցրեց, որ ընդամենը մեկ օր առաջ գլխավոր դատախազին առաջարկել էին, որպեսզի վերջինս կատարի պաշտոնական պարտականությունները և քրեական գործի շրջանակներում մեղադրանք առաջադրի և ձերբակալի հայ ժողովրդի ամենամեծ թշնամուն՝ Նիկոլ Փաշինյանին։

Ղազարյանի խոսքով՝ դատախազից պահանջ  կար նաև ,որպեսզի նա քրեական գործ  հարուցի օդից կախված և անպատիժ մնացած նաև մյուս հանցանքների համար։

«Պարզվում է գլխավոր դատախազը սխալ է հասկացել պահանջը և, տեղի տալով Նիկոլ  Փաշինյանին ապօրինաբար ծառայող ոստիկանների և քննչական մարմինների որոշումնրին, թույլատրություն և համաձայնություն է տվել, որպեսզի ձերբակալվեն և կալանավորվեն մեր շարքերի ազնիվ նվիրյալները։ Մարդիկ, որոնք դուրս են եկել պայքարելու՝ իրենց արժանապատվության և հայրենիքի փրկության համար»,- ասաց նա և մանրամասնեց․

«Ոչ մի տրամաբանություն և գիտակցություն չի կարող դիմանալ այն կեղծ, սուտ, մտացածին քրեական գործին, որի շրջանակներում ձերբակալվել է հասարակական, քաղաքական գործիչ Ավետիք Չալաբյանը։ Ոչ մի տրամաբանություն և հիմնավորում չի կարող լինել 2020թ․-ից անհաջող փորձերին, որոնցով ձերբակալվեց Գերասիմը։ Ոչ մի տրամաբանություն և հիմնավորում չենք կարող գտնել այն դեպքերին, երբ չարաշահելով մարդկանց սոցիալական վիճակը, տարիքը, անօգնական վիճակը՝ Գյումրիում մարդկանց մղել են արկածախնդրության , հրահրել են լարվածություն և դրա պատճառով փորձում են ձերբակալել մեր շարքերի ազնիվ երիտասարդներին։ Սա ապօրինություն է՝ կեղտոտ ձեռագրով»։

Էդգար Ղազարյանը շեշտում է՝ Ֆրանսիայի  հրապարակում չկա քաղաքականություն․

«Բոլորը գետին են դրել իրենց քաղաքական հայացքները։ Այս հրապարակում կա միայն հայրենասիրություն»։

Ղազարյանի մեջքի հետևում մեծ էկրանին ցուցադրվեց  քաղբանտարկյալների լուսանկարները։

«Այս մարդիկ ոչ միայն քաղբանտարկյալներ են , նրանք հայրենիքի պաշտպանության համար դուրս եկած մարդիկ են ,որոնք բանտ են նստել իրենց ազնիվ պայքարի համար»։

ՍԴ աշխատակազմի նախկին ղեկավարը փաստեց, որ իշխանությունները դիմում են կեղծ մեթոդների՝ ներքաշելով արդեն քաղաքականացված բուհերի ՈՒԽ նախագահներին, մղում են նրանց անմիտ խոսակցությունների և կեղծ ձայնագրությունների։

«Գաղտնալսումն արգելված է սահմանադրությամբ, փոխանակ գնան բացահայտեն գաղտնալսման հեղինակներին , հատվածաբար նյութերը մոնտաժող, մոնտաժի մասնագետներին և այդ նյութերը տարածող մարդկանց, գնում են կեղծ շինծու գործերի վրա նյութեր են սարքում՝ փորձելով վարկաբեկել համալսարանը»,- ասաց Ղազարյանը

Անդրադառնալով Ագրարային համալսարանի ՈՒԽ նախագահին, որն իբրև պատրաստակամություն է հայտնել 2000 ուսանողի հանել  ակցիաներին մասնակցելու ՝ 1000 դրամով, Ղազարյանը գրպանից հանեց հատուկ պատրաստված  հազար դրամանոց թղթադրամ՝ Ագրարային համալսարանի ՈՒԽ նախագահի նկարով և  հարցրեց․

«Պարոն Թոռնիկ, եթե ես հանձնեմ քեզ այս 1000 դրամանոցը քո նկարով, ի՞նչ ես պատրաստ անել դու այս հրապարակում գտնվող մարդկանց համար։ Համեցի, ստացիր քո կերպարով  1000 դրամանոցը և կատարիր այն, ինչ դու մտածում ես, որ կարող ես անել այստեղ գտնվող մարդկանց համար»։