Ձեր վստահելի աղբյուրը

«Ձեզ եմ ներկայացնում շատ կարևոր փաստաթուղթ ՝ Հանրային կառավարման բարեփոխումների ռազմավարությունը»,-կառավարության նիստում հայտնեց արդարադատության նախարար Կարեն Անդրեասյանը և հայտարարեց, որ այն իր կարևորությամբ պետության առաջնային փաստաթղթերի հնգյակում է, նույնսիկ այն դասեց  Սահմանադրությանը  հաջորդող հորիզոնականում:

Նախարարը մանրամասը ներկայացրեց «Հանրային կառավարման բարեփոխումների ռազմավարությունը, 2022-2024 թվականների ճանապարհային քարտեզը և արդյունքային շրջանակը, ռազմավարության իրականացման հսկողությունն ու համակարգումն ապահովող անձանց ցանկը հաստատելու մասին» նախագիծը:

«Հեղափոխությունից հետո երկրում իսկապես եղել են բազմաթիվ ձեռքբերումներ, որոնք չեն եղել այնքան, որքան պահանջվել է, քանի որ ինչպես դուք եք ճիշտ նշել՝ կոռուպցիան եղել է Հայաստանում եզակի կայացած ինստիտուտներից մեկը»,-ասաց Անդրեասյանը:

Նախարարն այդ հանգամանքով պայմանավորեց փաստաթղթի ձևավորման անհրաժեշտությունը և տեղեկացրեց, որ այն Արդարադատության նախարարությունը չի հեղինակել և 3 տարվա ծանր աշխատանքի արդյունք է:

«Այս փաստաթղթում օբյեկտիվ ախտորոշված են ողջ կառավարման համակարգի խնդիրները՝ բոլոր հարթություններում և ախտորոշման հետ միասին տրված են բոլոր հնարավոր լուծումները մի քանի փուլերով ՝2022-24 թթ., 2025-27 թթ. հաջորդը և 2028-30 թթ՝ երրորդ փուլը»,-հայտնեց Կարեն Անդրեասյանը և հայտարաեց, որ այն սկսվելու են իրականացնել անմիջական ընդունումից հետո:

Նախարարը տեղեկացրեց, որ, ըստ ռազմավարության, աշխատանքը հիմնական 4 ուղղություններով է լինելու, որից առաջինը՝ հանրային ծառայությունն է:

Ըստ Անդրեասյանի՝ մյուս խնդիրը մարդկային ռեսուրսներն են:

«Եղել են դեպքեր, երբ բարեկամներին, ազգականներին մտցրել են համակարգ, և ստեղծվել է քաղծառայության համակարգ, որը բավարար չափով չի խրախուսում, չի ներգրավում, չի կատարելագործում այն կադրերին, որոնք պետք են աշխատանքների իրականացման համար»,- ասաց նախարարաը և հավաստիացրեց, որ ռազմավարությունը հստակ տալիս է լուծումները, թե ինչպես պարգևատրել արժանավորներին, ինչպես հետաքրքիր դարձնել պետական ծառայությունը մասնավորի հետ մրցակցության պարագայում:

Ինստիտացիոնալ արդիականացման ներքո նախարարան անդրադարձավ պաշտոնյաների վարքագծին:

«Քաղաքական գործիչը կամ պաշտոնյան, նշանակվելով քաղաքական պաշտոնի, ունենում է բարի, լավ ցանկություններ, ուզում է իրականացնել լավ գործեր, բայց ինստիտուցիոնալ համակարգը ոչ միայն չի օգնում, այլև տեղ-տեղ միջին ու ստորին օղակներում նույնիսկ սկսում է խոչընդոտել»,-ասաց կարեն Անդրեասյանը:

Նրա խոսքով՝ վերջինը փուլը քաղաքականության ռազմավարական պլանավորումն է:

Փոխվարչապետ Մհեր Գրիգորյանն էլ նշեց, որ ռազմավարությունը միայն պետական մեքենայի լավարկման մասին չէ, որովհետև դա ուղղակի ազդեցություն ունի տնտեսության վրա, սոցիալական ոլորտում և ամենալուրջ ազդեցությունն ունի հակակոռուպցիոն արդյունավետ պայքարի համար: