Ձեր վստահելի աղբյուրը

Կառավարության ճեպազրույցների սրահում լրագրողը ՀՀ ՄԻՊ Քրիստիննե Գրիգորյանին հարցրեց, թե արդյո՞ք տեղյակ է Ավետիք Չալաբյանի գործի շրջանակներում կամովին քննչական մարմին ներկայացած միայնակ մոր՝ Էմմա Սարգսյանի ձերբակալության փաստի մասին, և ինչ է արվում այդ և ընդհանրապես ընդդիմադիր պատգամավորների ձերբակալության մասով իրավապահների գործողությունների իրավաչափությունը պարզելու համար:

Ք. Գրիգորյան- Բնականաբար, տեղյակ եմ, հետևում ենք գործընթացներին, և պետք է նշեմ, որ այդ դեպքերի մասով մենք պարզաբանումներ ենք պահանջել իրավապահ մարմիններից, որոնք նախաքննություն են իրականացնում: Նման գործերի հիմքերի իրավաչափության վերաբերյալ որևէ հետևության գալու համար պետք է ստանանք իրենց պարզաբանումները, որի արդյունքում նոր կկարողանանք որևէ հետևություն անել:

Հարց-Այսինքը՝ միայն հրապարակված հանգամանքների տեսանելի մասով իրավաչա՞փ եք համարում միայնակ մորը ձերբակալելը, այն դեպքում, երբ կինը ձայնագրության մեջ լսել է, որ իր անունն է շոշափվել և ներկայացել է իրավապահ մարմիններին բացատրություն տալու:

Ք. Գրիգորյան- Տեսանյութը չեմ տեսել, բայց դեպքի մասին տեղյակ եմ: Պարզաբանումներ ենք պահանջել՝ հասկանալու ձերբակալման հիմքերին ներկայացված պահանջը, նախաքննության այլ պահանջները, որոնք հնարավորություն կտան ասելու, թեանձն իր կամքով վարույթ իրականացնող մարմին ներկայանալուց հետո ինչն էր հիմք հանդիսացել նման վարքագիծ ունենալու համար:

Հարց-Բողոքի ակցիաների ժամանակ ձերբակալումների և կալանավորումների մեջ քաղաքական ենթատեքստ չե՞ք տեսնում: Ոստիկանության կողմից բազմաթիվ բռնության դեպքեր եղան, դրանք տեսախցիկները ֆիքսեցին, հաղորդումներ են տրվել, որ ոստիկանները պատժվեն և որևէ մեկը պատասխանատվության չի ենթարկվել, իսկ ակտիվիստներին տարբեր դրդապատճառներով միանգամից տանում են կալանքի: Հղի կնոջը վրաերթի դեպքով էլ պատժված չկա և այդպես շարունակ:

Ք. Գրիգորյան-Ոստիկանության կողմից անհամաչափ ուժի կիրառումը և կոնկրետ բռնության դեպքերը մեր կողմից նույնպես արձանագրվել են և համապատասխան արձանագրություններ և հաղորդումներ են ուղարկվել իրավապահ մարմիններին: Մենք առնվազն ծանուցվել ենք մի քանի դեպքերով, որոնք ավելի վաղ՝ մայիսի մեկից հետո էին տեղի ունեցել: Որոշների դեպում ծառայողական քննություններ էին սկսվել, որոշների դեպքում դատախազությունն էր որոշակի հաղորդմամբ հանդես եկել:

Հղի կնոջ վրաերթի փաստով նույն օրն ենք պարազաբանում պահանջել և տեղեկացված ենք, որ եթե նախապես խափանման միջոցը սահմանվել էր ստորագրություն՝ չհեռանալու մասին, ապա այսօր այն փոխվել է և այս պահին կալանք է կիրառված: Պրոցեսն ընթանում է մենք հետևում և հետևելու ենք գործընթացներին:

Մենք ոչ միայն պետք է դիմենք և արձագանքներ ստանանք, այլ պետք է հետևություն անենք, թե ինչպես փոխենք այդ վարքագիծը, կամ ֆունկցիոնալը, որպեսզի այդպիսի դեպքերից խուսափենք:

Ակտիվիստներին բերման ենթարկելու մասին մեզ ներկայացվել է կոնկրետ հանցագործությունների հատկանիշներ պարունակող արարքներ, կասկածներ, որոնց շրջանակներում անձինք բերման են ենթրակվել ևձերբակալվել: Մեք շարունակելու ենք հետևել այս պրոցեսներին և հավատացած եղեք, որ որևէ մեկը, որը որ որևէ կոնկրետ առերևույթ հանցագործության հետ չկապված արարքի կամ քաղաքական հայացքներով պատասխանատվության կենթարկվի, մենք բնականաբար չենք հապաղելու հետրություններ անելու մասով:

Հարց-Նոյեմբերի 9-ի դեպքերի դրվագներով այսօր ակցիաների ժամանակ են ձերբակալություններ արվում, ինչպե՞ս կգնահատեք այդ փաստը:

Ք. Գրիգորյան-Մենք իրականում պարզաբանում ուզել ենք իրավապահ մարմնից, որովհետև իրենք ամբողջ տեղեկատվութունը ունեն արագ հետևությունների համար: Շատ ռիսկային է նման հետևություն անելը, պետք է ստանալ իրավապահ մարմնի կողմից հարցի պատասխանը, թե արդյո՞ք ինչն է հանդիսացել հիմքը, որ հենց հիմա են անձի նկատմամբ կալանք կիրառում այսքան ժամանակ երկար քննված գործի վերաբերյալ: Ըստ այդմ կարող ենք անել հետևություններ, երբ որ կստանանք պարզաբանումներ: