Ձեր վստահելի աղբյուրը

«Այս իշխանությունը մեր հանրությանը խաբել է բոլոր ոլորտներում»,-Ֆրանսիայի հրապարակում ընթացող ասուլիսում հայտարարեց ՀՅԴ ԳՄ անդամ, ԱԺ փոխնախագահ, Նիկոլ Փաշինյանի հրաժարականի պահանջով պայքարի առաջնորդներից Իշխան Սաղաթելյանը։

Նա թվարկեց, գործող իշխանությունը խոստացել է սեր և համերաշխություն, բերել է ատելություն ու պառակտում, խոստացել է ներդրումներ ու աշխատատեղեր, արժանապատիվ ու բարեկեցիկ կյանք, բայց չկան ներդրումներ, մարդիկ ամեն օր ապրում են ավելի վատ, խոստացել են անվտանգություն, բարեկեցություն, Արցախի հարցում խոստացել էին, որևէ որոշում առանց ժողորդի չեն կայացնելու, այստեղ ևս խաբել են, խոստացել են հայ մարդու երջանկություն, բերել են մահ ու կորուստներ։

«2018-ին փողոց դուրս եկած մարդիկ խաբված են։ Խոստացել էին ժողովարդավարություն, խոսքի ազատություն, բայց այսօր տեսնում եք՝ ինչ է կատարվում Հայաստանում։ Խոստացել են արդարադատություն, շրջափակել են դատարանները։ Այն դատավորները, որ չեն ենթարկվում իրենց հրահանգներին, ապօրինի չեն  ձերբակալում ընդդիմադիր գործիչներին, իրենք կալանքի են տանում այդ դատավորներին։ Խաբել են մարդկանց բոլոր հարցերում»,-ասաց Սաղաթելյանը։

ԱԺ փոխնախագահն ասաց՝ իշխանափոխությունից հետո իրենք իրականացնելու են այն բոլոր խոստումները, որոնք ժողովրդին տվել ու չեն կատարել Փաշինյանն ու նրա թիմը։

«Հայ մարդը Հայաստանում պետք է ապրի բարեկեցիկ, արժանապատիվ, Հայաստանում պետք է լինեն ներդրումներ, դրա բոլոր նախադրյալները կան։ Բայց մեր առաջին խնդիրը պետք է լինի վերջ դնել այս ատելության, պառակտված, թշնամության մթնոլորտին, պետք է՝ համախմբենք ողջ հայ ժողովրդի ներուժը»,-հայտարարեց  ընդդիմադիր գործիչը։

Նրա խոսքով, լուծումները հեշտ չեն լինելու, քանի որ երկիրը կանգնած է լուրջ մարտահրավերների առաջ։

«Մենք որևէ մեկին կախարդական փայտիկ չենք խոստանում, ինչպես իրենք էին խոստանում։ Մենք հայ գյուղացուն չենք ասում, եթե գանք իշխանության, ձեր կովերի կաթնատվությունը կբարձրանա, ինչպես իրենք էին ասում։ Բայց մենք հայ գյուղացուն ասում ենք՝ մենք քո կողքը կանգնելու ենք»,-ասաց նա՝  նշելով, որ գյուղացին այսօր մենակ է մնացել իր խնդիրների հետ։

Սաղաթելյանը պնդեց՝ էս էկոնոմիկայի նախարարով  գյուղատնտեսություն ու տնտեսություն չենք կարող զարգացնել, արդարադատության էս նախարարով երկրում չենք կարող արդարադատություն ունենալ, էս Մարդու իրավունքների պաշտպանով Հայաստանում մարդու իրավունքերը երբեք պաշտպանված չեն լինի, քանի որ նա «ՔՊ-ականներին սուրճ դնողի կամ չգիտեմ իրենց պաշտպանությամբ զբաղվողի ֆունկցիա ունի, դուք տեսնո՞ւմ եք երկրում տեղի ունեցող ապօրինություններին ՄԻՊ-ի արձագանքը»։

«Համատարած անբանություն, անկարողություն է, դիլետենտ մարդկանց խումբ է, որոնք ժողովրդին խաբելով հայտնվել են իշխանության, օրեցօր երկիրը տանում են անդունդ։ Ի՞նչ պետք է անեն։ Այս բոլոր սխալներն ուղղենք»,-ասաց նա։