Ձեր վստահելի աղբյուրը

«Ուզում եմ հիշեցնել ապրիլի 5-ի մեր հանրահավաքի մասին, երբ թշնամու հերթական ագրեսիայից հետո խորհրդարանական երկու ընդդիմադիր խմբակցությունները որոշեցին հրավիրել հանրահավաք ի պաշտպանություն Արցախի և Հայաստանի»,-ասաց ՀՅԴ ԳՄ անդամ, ԱԺ փոխնախագահ, Նիկոլ Փաշինյանի հրաժարականի պահանջով պայքարի առաջնորդներից Իշխան Սաղաթելյանը Ֆրանսիայի հրապարակում հրավիրած մամուլի ասուլիսի ժամանակ։

Նա կարևորեց ապրիլի 5-ը, քանի որ պայքրաի մեկնարկը տրվել է այդ օրը։

«Ապրիլի 5-ին մենք Ազատության հրապարակում շատ հստակ ներկայացրեցինք այն սկզբունքներն ու պահանջները, որով պետք է առաջնորդվի Հայաստանի ցանկացած իշխանություն։ Հստակ հայտարարեցինք, այն իշխանությունը, որ կշեղվի այս սկզբունքներից ու պահանջներից, պետք է օր առաջ հեռացվի, և այս իշխանության դեմ ժողովուրդն իրավունքի ունի իր բողոքի ձայնը բարձրացնել ու անհնազանդության ճանապարհով հեռացնել»,-ասաց նա՝ պատահական չհամարելով, որ այդ օրն Արցախի դրոշը տեղադրվեց Ֆրանսիայիի հրապարակում, հանրապետության այլ քաղաքաներում։

Խորհրդարանում Նիկոլ Փաշինյանի՝ Արցախի կարգավիճակի նշաձողը իջեցնելու մասին հայտարարությունից հետո ընդդիմությունը որոշել է փողոցային անդադար պայքար սկսել։

«Ապրիլի 25-ից մենք սկսել ենք համաժողովրդական «Դիմադրության» շարժումը, իսկ մայիսի 1-ից մինչ օրս տեսնում եք ինչ ծավալի ու չաթի անհնազանդության երթեր, հավանքեր ենք իրականացրել, հայ ժողովուրդը ոտքի է կանգնել օրվա իշխանության վարվող քաղաքականության դեմ»,-ասաց նա։

Նա ներկայացրեց մի քանի ձեռքբերումներ, որ ունեցել է շարժումը.

1. Շարժումը կասեցրել է Արցախի հարցում հայկական կողմի նշաձող իջեցնելու գործընթացը։ Սա այլևս փաստ է, դա ակնհայտ է։
2. Շարժումը ստեղծել է իրական քաղաքական ճգնաժամ, այդ թվում նաև մեր միջազգային գործընկերների համար առնվազն այս պահին ակնհայտ է դառնում Նիկոլ Փաշինյանի լեգիտիմության հարցը։
3. Շարժումն ապացուցել է, որ հայ ժողովուրդը չի ընդունելու իրեն պարտադրված որևէ զիջում, և Նիկոլ Փաշինյանը չունի մանդատ երկիրը նոր զիջումների տանելու։
4. Շարժումն ակնհայտ է դարձրել, որ կա հանրային ձևակերպված պահանջ այս  իշխանություններին հեռացնելու։ Շարժումը վերջին 30 տարվա անկախ Հայաստանի պատմության մեջ բացառիկ է իր ծավալներով, չափերով, ժողովրդականությամբ։ Այն, ըստ էության ղարաբաղյան երկրորդ շարժումն է։