Ձեր վստահելի աղբյուրը

«Հայաստանի Հելսինկյան կոմիտե» իրավապաշտպան հասարակական կազմակերպությունը Նիկոլ Փաշինյանի հրաժարականի պահանջով իրականցվող բողոքի ակցիաներով պայմանավորված լարված օրերին ամենօրյա մշտադիտարկում է իրականացնում։

Կոմիտեի նախագահ Ավետիք Իշխանյանն այսօր հրապարակեց Խաղաղ հավաքների ազատության մշտադիտարկման միջանկյալ զեկույցը՝ հիշեցնելով, որ ևս մեկ միջանկյալ զեկույց հրապարակել են մոտ տասը օր առաջ։ 

«Ինչո՞ւ որոշեցինք շտապել ու նույնիսկ չսպասել մինչև երկուշաբթի։ Խնդիրն Ավետիք Չալաբյանի ձերբակալությունն է»,-լրագրողներին ասաց Իշխանյանը։

20 էջանոց զեկույցում ներկայացված են ապրիլ-մայիս ամիսներին ընդդիմության բողոքի ակցիաների ընթացքում գրանցված խախտումները, խնդիրները։  Դիտարկվել է մոտ 80 հավաք, մարզերի ակցիաների ժամանակ դիտորդներ չեն եղել, բավականին մանրամասն ուսումնասիրվել են մարզային հավաքների տեսանյութերը։

ՀԿ արձանագրած խնդիրներից մեկը վերաբերում է ոստիկանների նույնականացմանը։

«Մայիսի 2-ի բողոքի ակցիաների ժամանակ բազմաթիվ ոստիկաններ տարբերանշաններ չեն ունեցել, մասնակիցների բերման ենթարկելու գործողություններին մասնակցել են դիմակներով դեմքերն ամբողջությամբ ծածկած, տարբերանշան չունեցող ոստիկանական համազգեստ կրող անձինք, սա միջազգային, եվրոպական բոլոր նորմերի խախտում է»,-ասաց նա։

Միջանկյալ զեկույցում տեղ է գտել նաև մայիս 4-ին ԱԺ շենքի բակում տեղադրված լուսաձայնային նռնակների, ինքաձիգներով զինված ԱԱԾ աշխատակիցների, դիպուկահարների ներկայությունը։

«Ամենակարևորը խաղաղ հավաքների ժամանակ ոստիկանության ու իրավապահ մարմինների ուժերի համաչափ տեղադրումն է, մինչդեռ Հայաստանում ոչ միայն այդ համաչափությունը չկա, այլև կարծես խաղաղ հավաքների մասնակիցներին ցանկանում են ահաբեկել դիպուկահարներով»,-ասաց Իշխանյանը։

«Դիմադրության» շարժման մասնակիցներին էլ զեկույցում առաջարկություններ են ներկայացվել, պետք է ակցիաների կազմակերպիչները նշանակեն կարգադրիչներ, վերջիններն էլ պետք է ունենան հատուկ թևկապներ։

«Կարգադրիչի դեր իրականացնում են կազմակերպիչները, բայց նրանք ամեն տեղ չեն հասցնում լինել։ Ցանկալի կլիներ, որ նրանք ակցիաների մասնակիցների, ցուցարարների մեջ լինեն «կարգադրիչ» գրությամբ թևկապներով մարդիկ։ Սա շատ կարևոր խնդիր է»,-ասաց բանախոսը։

Զեկույցի հեղինակները նշում են, որ ակցիայի մասնակիցներին բերման ենթարկելը ոստիկանների կողմից հաճախ ուղեկցվում է անհամաչափ ուժի կիրառմամբ ու բռնություններով։

«Ես նույնիսկ կասեի, ուղեկցվում են անհիմն ուժի կիրառմամբ։ Օրինակ, մայիսի 2-ին Սայաթ-Նովա և Աբովյան փողոցների խաչմերուկում ոստիկանը բռունցքով հարվածներ է հասցնում ցուցարարի գլխին՝ կրելով կոշտ ձեռնոցներ։ Այդպիսի դեպքեր նկատվել են Իտալիա-Խորենացի փողոցների խաչմերուկում անցկացված բողոքի ակցիայի ժամանակ։ Ստացվել են արժանահավատ տեղեկություններ դրանց հետևանքով ակցիայի մասնակիցների ֆիզիկապես տուժելու մասին»,-ներկայացրեց բանախոսն ու ավելացրեց, բոլոր դեպքերն ունեն հղումներ։

Զեկույցում տեղ են գտել մայիսի 10-ին Ռուբինյանց-Սևակ խաչմերուկի հավաքի ընթացքում ոստիկանության գործողությունների մասին արձանագրումներ, երբ նրանք բռնություն են գործադրել կին ցուցարարների նկատմամբ։ Արձանագրվել է, թե ինչպես է ոստիկանը թքում բերման ենթարկվող ցուցարարների ուղղությամբ, նշանակված է ծառայողական քննություն։

Կան դեպքեր, ըստ զեկույցի, երբ ոստիկաններն ուժ են կիրառել անչափահասների ու տեղաշարժման սահմանափակ հնարավորություն ունեցող անձանց նկատմամբ։

«Նման գործելաոճը արգելված է ոստիկանության պարեկային կանոնագրքով»,-ասաց Իշխանյանը։