Ձեր վստահելի աղբյուրը

««Դիմադրություն» շարժումը մասամբ կասեցրել է Արցախի կարգավիճակի նշաձողն իջեցնելու գործընթացը։ Առնվազն հանրային դաշտում իշխանությունը սկսել է քողարկել իր իրական նպատակները, փորձում է կեղծել իրականությունը և չունի համարձակություն ասելու այն, ինչին տանում են այս երկիրը։ Սա մեր հաջողությունն է և ժողովրդի ուժը»,- այս մասին Ֆրանսիայի հրապարակում հայտարարեց «Դիմադրություն» շարժման առաջնորդ, ԱԺ փոխնախագահ Իշխան Սաղաթելյանը՝ թվարկելով այս օրերին ձեռք բերած հաջողությունները։

Նրա խոսքով՝ երկրում ստեղծվել է իրական քաղաքական ճգնաժամ, որը տեսնում են Նիկոլի միջոցով երկրում հակահայկական ծրագրեր իրականցնողները, իսկ դաշնակիցների ու գործընկերների համար ակնհայտ է դառնում, որ Նիկոլը կորցրել է իր լեգիտիմությունը և նրա հետ այլևս որևէ բան պայմանավորվելն անիմաստ է։ «Բոլոր նրանք, որոնք դեռ սա չեն հասկացել, ապա առաջին օրերին կհասկանան»,- ասաց նա։

Ըստ Իշխան Սաղաթելյանի՝ շարժումն ակնհայտ է դարձրել, որ երկրում ձևավորվել է այս իշխանությունների հեռացման հանրային պահանջ. անցնող օրերի իրենց գործունեությունը և հանրային արձագանքը դրա վառ վկայությունն է:

«Այս ձեռքբերումներն արել ենք անցած օրերին համատեղ աշխատանքով, բայց սա բավարար չէ, այս ձեռքբերումները անշրջելի դարձնելու համար պետք է լուծենք գլխավոր խնդիրը՝ հեռացնենք այս դավաճան իշխանությանը:

Նաև ուզում եմ մեկ հայտարարություն անել։ Ես հատուկ զգուշացնում եմ Նիկոլին սպասարկող և այս իշխանության հենարան օլիգարխներին՝ դրանց անունները ձեզ հայտնի են։ Ուշքի եկեք Նիկոլին պաշտպան, Նիկոլին ֆինանսավորող օլիգարխներ։ Դուք դեռ ուղղվելու շանս ունեք, միացեք ժողովրդին և նրա պայքարին, դադարեցրեք ֆինանսավորել ֆեյքերի ֆաբրիկաները և ձեր գործունեությամբ նպաստել, որ այս իշխանությունը մեկ օր ավելի մնա։ Վստահեցնում եմ, որ այս իշխանությունը հեռացվելու է, իսկ եթե դուք խելքի չգաք՝ հատ-հատ պատասխան եք տալու»,- հայտարարեց Իշխան Սաղաթելյանը։

Նրա խոսքով՝ այս իշխանությունն աղետաբեր է Արցախի և հայության համար, ուստի պարտության և պատերազմի խորհրդանիշ ուժը պետք է հեռանա, այն չի կարող խաղաղություն ապահովել։
«Ի՞նչ իշխանություն է մեզ պետք։ Մեր երկիրը պետք է ունենա ազգային իշխանություն, որը կկասեցնի պետականության կործանման այս ընթացքը, կապահովի երկրի սահմանների  պաշտպանությունն ու անձեռնմխելիությունը, կիրագործի տարածքային ամբողջականությունը պաշտպանելու իր հիմնական գործառույթը, կհաստատի արժանապատիվ խաղաղություն, պետականությունը կվերադարձնի ժողովրդին, Հայաստանը կդարձնի արժանապատիվ, արդար, բարեկեցիկ և անվտանգ երկիր։ Հայ ժողովրդին պետք է այդպիսի իշխանությունը»,- ասաց նա։

Ըստ Իշխան Սաղաթելյանի՝ պետք է վերջ դրվի պոպուլիզմին, ստին, պարտվողականությանը, այսինքն՝ քաոսին այլընտրանք առաջարկող իշխանություն է պետք, որը տեր կկանգնի մեր հաղթանակներին, կվերցնի պատմական ու քաղաքական պատասխանատվություն երկիրն այս իրավիճակից դուրս բերելու համար։ Պետք է այնպիսի իշխանություն, որ կհամադրի փորձը և երիտասարդությունը, կհրաժարվի անպատասխանտվությունից և կգնա իրական բարեփոխումների։

«Այդ իշխանության նպատակը պետք է լինի ոչ միայն ժողովրդին դուր գալը, այլ ժողովրդի համար աշխատելը, իսկ այս պոպուլիզմները հեռու են դրանից։ Պոպուլիզմը քանդում է երկիրը, դա հանրահայտ ճշմարտություն է։ Օրվա իշխանությունն ունի մեկ նպատակ՝ մտածում է բացառապես իր աթոռի և վարկանիշի մասին։ Ցանկացած պոպուլիստ իշխանություն երկիրը քանդելուն զուգահեռ փորձում է հաստատել բռնատիրություն, որ իր իշխանությունը պահի։ Հայաստանում մեկ մարդու իշխանություն չի լինելու, պոպուլիստները վռնդվելու են»,- նշեց Իշխան Սաղաթելյանը։

Նա մեկ անգամ ևս շեշտեց, որ ներկայիս իշխանությանը հեռացնելուց հետո Հայաստանում կձևավորվի Ազգային համաձայնության ժամանակավոր կառավարություն, որը երկիրը կտոր-կտոր հանձնելու Նիկոլի մտադրությանը կհակադրի Հայաստանը ոլորտ առ ոլորտ վերականգնելու քաղաքականությունը։

Դրա համար, ըստ Իշխան Սաղաթելյանի, առաջին հերթին պետք է համերաշխություն, կայունություն և անվտանգություն։

«Պետք է վերականգնենք մեր ներքին միասնությունը։ Հանդարտ ու գրագետ աշխատանքով կառուցենք ուժեղ Հայաստան: Ուժեղ ու կայացած պետության երեք հիմնասյուներն են՝ տնտեսությունը, բանակը և արտաքին քաղաքականությունը։

Տեսեք, թե Հայաստանում ովքեր են այդ ոլորտները ղեկավարում և կհասկանաք, թե ինչի ենք այս իրավիճակում»,- ասաց Իշխան Սաղաթելյանը։

Նա թվարկեց այն քայլերը, որոնք պետք է իրականացնեն իշխանություններին հեռացնելուց հետո։

«Պետության ողնաշարը հանդիսացող համակարգերի վերականգնում՝

- Սպառողական, արժեք չստեղծող տնտեսության փոխարեն՝ մրցունակ ու առաջադեմ, նոր տեխնոլոգիաների վրա հիմնված տնտեսություն,

- Կազմաքանդված, բարոյալքված բանակի փոխարեն՝ մարտունակ, սպառազինություններով հագեցած  զինված ուժեր, այդ բանակը պետք է լինի ոչ միայն պաշտպանողական, այլ հարկ եղած դեպքում նաև հարձակողական բանակ,

- Մուրացիկ դիվանագիտության փոխարեն պետք է ունենանք ազգային շահերի վրա հիմնված պրոֆեսիոնալ, նախաձեռնողական, գործընկերային, բայց ոչ ստրկական արտաքին քաղաքականություն։ Արտաքին քաղաքականության ոլորտում պետք է հանդես գանք մեր օրակարգով, Արցախի ու Հայաստանի շահերը սպասարկող օրակարգով։

Մենք դա կարող ենք անել, դա անելու ենք միասին։ Ծրագրերը կան, ամեն օր ներկայացնելու ենք մեր ծրագրերը։ Ովքեր ասում են, թե ընդդիմությունը «Նիկոլ, դավաճան» ասելուց բացի ծրագիր չունի, ապա նրանք կամ կույր են, կամ ականջ չունեն։ Այդ ծրագրերը կան, բայց սա մեր նախընտրական պայքարի հարթակը չէ, մենք ներկայացնում ենք հիմնական ուղղությունները, սկզբունքները, որ մեր քաղաքացիները տեսնեն, հավատան, վստահեն, որ երկիրն այս իրավիճակից դուրս բերելու և՛ ծրագիրը կա, և՛ թիմը կա»,- հայտարարեց Ւշխան Սաղաթելյանը։