Ձեր վստահելի աղբյուրը

Խաղաղ անհանզանդության ակցիաները մայրաքաղաքում շարունակվում են։ Մասնակիցների մի խումբը ԱԺ «Հայաստան» խմբակցության պատգամավորների ուղեկցությամբ Աբովյան փողոցից երթով շարժվում է Թումանյան փողոց «Առանց Նիկոլ Հայաստան» վանկարկումներով։

Պատգամավոր Արամ Վարդևանյանը նշեց, որ հերթական խաղաղ երթի ընթացքում ոստիկաններն ուժ  են գործադրել և բերման են ենթարկել ակցիայի մասնակիցներին. «Բայց ինչպես տեսնում եք՝ մենք չենք պակասում և ասում ենք՝ պայքար, պայքար»։

Սակայն այս երթը նույնպես առանց միջադեպերի չանցավ։ Մեծ թվով կարմիր բերետավորներ հայտնվեցին տարածքում և առանց որևէ բան ասելու գետնին տապալեցին մարդկանց՝ հանկարծակի բերելով նրանց։ Թեև մարդիկ ասում են, որ իրենք կմոտենան ոստիկանական մեքենաներին, սակայն բերետավորները բիրտ ուժ կիրառելով, քաշքշելով, թևերը ոլորելով նրանց նստեցնում են մեքենաներ։ 

«Տեսնո՞ւմ եք, թե ի՞նչ եք անում»,- ոստիկաններին դիմեց Արամ Վարդևանյանը, նրանցից մեկը պատասխանեց. «Ախպերս, ոչ մեկին վնաս չենք տալիս»։

«Նիկոլը ձեր այս պահվածքով իշխանությունը հանձնում է»,- ոստիկաններին ասաց պատգամավոր Արթուր Ղազինյանը, ինչին կարմիր բերետավորներից մեկն արձագանքեց. «Ով ինչ ուզում է թող անի, իրենց գործն է»։

Նա պատգամավորներին հորդորեց քայլել մայթերով, սակայն նրանք ասացին, որ չեն կարող, քանի որ մարդկանց թիվը մեծ է։ «Ընկեր Վարդևանյան, այսքան մարդիկ չեն կարո՞ղ մայթով գնան»,- ասաց կարմիր բերետավորը, պատգամավորն էլ նշեց, որ իրենք խաղաղ ակցիա են անում, իսկ ոստիկանները պետք է իրենց աջակցեն, այլ ոչ թե առևանգեն ակցիա իրականացնողներին։

Նշենք, որ կարմիր բերետավորներին միացան նաև մեծ թվով ոստիկաններ։

Արթուր Ղազինյանը նշեց, որ 500-ից ավելի մարդ են բերման ենթարկել, բայց միևնույն է իրենք շարունակելու են պայքարել։