Ձեր վստահելի աղբյուրը

«Մեր առջև դրված խնդիրը լիարժեք կատարել ենք։ Մեր քաղաքացիներն այսօր փաստեցին՝ այլևս իրենք են իրադրության տերը, Նիկոլը Հայաստանում չունի իշխանություն, իսկ ոստիկանական բիրտ ուժն այլևս չի կարող ճնշել ժողովրդի շարժումը»,- ֆեյսբուքյան ուղիղ եթերում ասաց ՀՅԴ ԳՄ ներկայացուցիչ Իշխան Սաղաթելյանը՝ շնորհակալություն հայտնելով քաղաքացիներին, ովքեր այսօր առավոտից դուրս էին եկել փողոց, մասնակցել խաղաղ անհնազանդության ակցիաներին։

Նա նշեց, որ քաղաքացիներն այսօր ապացուցել են՝ երկրում երկիշխանությունն այլևս հաստատված է, իրենք են որոշում, որ փողոցը պետք է փակվի և ինչ ժամանակում։

Սաղաթելյանն առաջակեց  ժամը 11:30-ից դադարեցնել անհնազանդության ակցիաները, ժամը 19։00-ին հրավիրում է Ֆրանսիայի հրապարակ հանրահավաքի։

«Այսօրվա ակցիաների ընթացքում մենք ունենք մի քանի հարյուր բերման ենթարկվածներ, ոստիկանական բաժիններում տեղ չկա, ոստիկանական բաժինների պատուհաններից հնչում է  «Նիկոլ հեռացիր», «առանց Նիկոլ Հայաստան», ամբողջ քաղաքն ապրում է  այդ մթնոլորտում, այլևս ակնհայտ փաստ է, որ ժողովուրդն է  իրադրության տերը։

Միասնական գնում ենք առաջ, այս շարժումն անկասելի է,  ձեր հաղթանակն անխուսափելի»,- ասաց ՀՅԴ ԳՄ ներկայացուցիչ Իշխան Սաղաթելյանը։

Նիկոլ Փաշինյանի հրաժարականը պահանջող և Հայաստանի ու Արցախի անվտանգությամբ մտահոգ քաղաքացիները վաղ առավոտից Երևանում սկսել են անհնազանդության ակցիաներ։ Ոստիկանները ուժի գործադրմամբ, քաշքշելով ու հրմտշելով խաղաղ ակցիայի մասնակիցներին բերման են ենթարկում։