Ձեր վստահելի աղբյուրը

Երևանում վաղ առավոտից մեկնարկել են Նիկոլ Փաշինյանի հրաժարականը պահանջող, Հայաստանի և Արցախի անվտանգությամբ մտահոգ քաղաքացիների խաղաղ անհնազանդության ակցիաները։ Միաժամանակ Ֆրանսիայի հրապարակից մեկնարկել է իրազեկման ակցիա։

«Միություն, պայքար, հաղթանակ», «Նիկոլ դավաճան» վանկարկելով քաղաքացիները, քաղաքական գործիչները երթ են իրականացնում երևանյան փողոցներով։ 

«Այսօր վաղ առավոտից մեկնարկել են անհնազանդության խաղաղ ակցիաները։ Այսօր ոստիկանությունը կրկին բիրտ ուժ կիրառելով՝  բերման ենթարկեց մեր արժանապատիվ քաղաքացիներին։ Բայց մեզ արդեն միանում են բաժիններից դուրս եկած քաղաքացիներն ու շարունակում են պայքարը։ Ինչքան էլ փորձեն մեզ բերման ենթարկել, ինչքան էլ փորձեն ուժ կիրառել, մենք ավելի ենք ուժեղանալու։ Այս պայքարն անկասելի է, այն արդար է և այն հանուն Հայաստանի, հանուն Արցախի ու հայ ժողովրդի համար է։

Միացեք մեր երթին, անհնազանդության ակցիաներին»,- երթի ժամանակ հայտարարեց «Հայրենիք» կուսակցության նախագահ Արթուր Վանեցյանը։

Երթի ընթացքում հենց բնակարաններից իջնում են քաղաքացիներ ու միանում պայքարին։ Քաղաքացիներից մեկը փակեց իր խանութն ու միացավ երթին։

Ակցիայի մասնակիցները մտան Երևանի թատրոնի և կինոյի պետական ինստիտուտ՝ վանկարկելով «առանց Նիկոլ Հայաստան», «Նիկոլ հեռացիր»։ Մի խումբ ուսանողներ միացան պայքարին:

Այնուհետև երթի մասնակիցները նստեցին հենց Ամիրյան փողոց- Մաշտոց պողոտա խաչմերուկին՝ մի քանի րոպե կանգնեցնելով երթևեկությունը։ 

Ժամը 19։00-ին Ֆրանսիայի հրապարակում տեղի ունենա հանրահավաք։