Ձեր վստահելի աղբյուրը

«Առանց թուրքի Հայաստան, առանց թուրքի Հայաստան»,-այսպես սկսեց խոսքը Ֆրանսիայի հրապարակում ընթացող հանրահավաքում «Հայրենիք» կուսակցության նախագահ Արթուր Վանեցյանը։

Նա անդրադարձավ այն ոստիկաններին, որոնք վիրավորվում են իրենց «թուրք» ասելուց։

«Ասում են՝ մեզ թուրք եք ասում։ Ասում ենք՝ ձեզ նորմալ պահեք, թուրք չենք ասի։ Ասում են՝ մեզ թուրքի հետ եք համեմատում։ Ասում ենք՝ մենք որևէ մեկին թիրախային թուրք չենք ասում, դուք ձեր արարքներից հասկանում եք, որ թուրքի արարք եք անում, դրա համար եք ձեզ վրա վերցնում»,-ասաց Վանեցյանը՝ հայտարարելով, որ բոլորը պատասխան են տալու օրենքի առաջ, չի լինելու մեկը, որ պլստա։

Ելույթում նա անդրադարձավ արցախյան 44-օրյա պատերազմում զոհված Մխիթար Գալեյանի հոր և հորեղբոր՝ Գարիկ և Արթուր Գալեյանների ձերբակալությանը, ասաց՝ իր համար բարդ թեմա է։

«Երբ առավոտյան իրականացրեցինք անհնազանդության ակցիաները, լուր ստացանք, որ այս իշխանությունները որոշում են կայացրել ձերբակալել Գարիկ Գալեյանին, 44-օրյա պատերազմում նահատակված մեր հերոսի հորը»,-ասաց նա։

Վանեցյանը հիշեցրեց՝ երկար ժամանակ է,  նահատակված հերոսների ծնողները պահանջում են, որ իրավապահները հայտնաբերեն ու պատասխանատվության  ենթարկեն այն անձին, ում պատճառով զոհվել են մեր տղեքը։ Դատախազությունը քննչական մարմնին հանձնարարել է այդ գործի շրջանակներում հարցաքննության հրավիրել վարչապետի պաշտոնը զբաղեցնող անձին։

«Քննիչը մինչ այս պահը չի կատարել այդ պահանջը։ Մեր զոհված զինվորների ծնողները գնացել են զինվորական քննչական վարչություն, իրենց խոսքն են բարձրացրել, ասել են՝ պարտավոր եք կանչել ու հարցաքննել։ Սկսել են տարբեր պատճառաբանություններ ներկայացնել, թե ինչու չեն հրավիրում Նիկոլ Փաշինյանին։ Ծնողները վրդովվել են, բողոքի ակցիա են իրականացրել։ Ընթացքում դուրս է եկել մեկը գնդապետի ուսադիրներով, Գարիկ Գալեյանը մոտեցել է ու իր արդարացի պահանջնէ  ներկայացրել։ Հետագայում պարզվել է, որ քննչական վարչության մոտ հինգ մետր ընդհանուր բակով նորաստեղծ զորամաս է։ Ու հիմա Գարիկ Գալեյանին մեղադրանք են առաջադրել Քր. Օրենսգրքի 327.6 հոդվածի հատկանիշներով, զորամաս կամ հատուկ պահպանվող տարած ապօրինի մուտք գործելու համար, որը նախատեսում է մինչև հինգ տարի ազատազրկում։ Դուք պատկերացնո՞ւմ եք ինչի մասին է  խոսքը»,-ասաց Վանեցյանը, ինչին հետևեցին իրավապահների հասցեին սուլոցներ ու «ամոթ» վանկարկումներ։

Ընդդիմադիր պատգամավորն ասաց՝ որոշել են ձերբակալել նաև Մխիթարի հորեղբորը՝ Արթուր Գալեյանին։ Վայեցյանն ու այլ պատգամավորներ մի քանի ժամ այսօր անցկացրել են քննչական վարչությունում, անձնական երաշխավորություն են ներկայացրել խափանման միջոցը՝ հնարավոր կալանք չկիրառելու համար։

Ելույթից առաջ Վանեցյանին հայտնել են, որ Գարիկ Գալեյանի նկատմամբ խափանման միջոց են ընտրել ստորագրություն երկրից չհեռանալու վերաբերյալ։

«Արթուր Գալեյանի մասով կարծես չեն ուզում նման որոշում ընդունել, մենք պարտադրելու ենք, որ իրենց որոշումը  փոխեն։ Երբ ես դուրս եկա քննչական վարչությունից, այնտեղ զոհված զինծառայողների մոտ հիսուն ծնող կար։ Նրանք ասացին՝ մենք բոլորս Գարիկ ենք, մենք բոլորս Արթուր ենք, պահանջելու ենք, որ նրանք ազատ արձակվեն։ Ասացին՝ Ֆրանսիայի հրապարակում փոխանցեք, որ մեզ հանկարծ մենակ չթողնեն։ Մենք որևէ պարագայում մեր հերոսածին ծնողներին մենակ չենք թողնելու»,-ասաց Վանեցյանը։

Նրա խոսքին հետևեցին ծափահարություններ ու «այո» բացականչություններ։

«Հայրենիք» կուսակցության նախագահը շեշտեց՝ այս իշխանությունները չորս հազարից ավելի տղաների են զոհել, բայց մինչ այս պահը պատասխանատվության չեն ենթարկվել, մինչդեռ մեկ օրում  հերոսածին ծնողին ձերբակալելու որոշում է  կայացվել։

«Ամոթ, ամոթ, ամոթ»,-Վանեցյանի խոսքն ընհատվեց «ամոթ» վանկարկումներով։- «Մենք բոլորս իրար հետ մեր պայքարը հասցնելու ենք տրամաբանական ավարտին։ Դուք տեսնում եք, որ ամեն օր ավելի շատ մարդիկ են գալիս։ Կարևոր չէ, որ նկարում են, ասում են հազար մարդ կա, հազար հիսուն մարդ կա։ Այստեղ մարդ կա, հազար մարդու տեղ է։ Այստեղ վճռվում է հայ ժողովրդի պատմությունը, հայ ժողովուրդը եղել է, կա, մնալու է։ Մենք ապրելու ենք հզոր, ինքնիշխան, անվտանգ, Հայաստանում։  Ունենալու ենք անկախ Արցախ, լավ ապրող, արժանապատիվ ապրող քաղաքացի»,-ասաց նա՝ ավելացնելով, որ պայքարի հաղթանակը  բերելու է նոր հաղթանակներ. վերականգնելու են երկրի անվտանգությունը, մարդկանց արժանապատվությունը, նորմալ ապրելու իրավունքը։

Դիմելով հավաքվածներին՝ Վանեցյանն ասաց, պինդ են, միասնական ու մի բռունցք։

«Իրար հետ անպայման շատ կարճ ժամանակ անց ասելու ենք հաղթանակ, Արցախ, Հայաստան»,-ելույթն ամփոփեց նա։