Ձեր վստահելի աղբյուրը

«Մենք ի սկզբանե ասել ենք՝ դժվար է լինելու, բայց օրեցօր ավելանալու ենք, մեջք մեջքի կանգնելով՝ մեր պայքարն առաջ ենք տանելու»,- Ֆրանսիայի հրապարակում հանրահավաքի ժամանակ ասաց ՀՅԴ ԳՄ ներկայացուցիչ Իշխան Սաղաթելյանը։

Շարունակելով խոսքը՝ նշեց. «Երբ ես ասում եմ՝ սա նման է ու իրականում նոր ղարաբաղյան շարժում է, սա նկատի ունեմ, որ մարդիկ այսօր իրենց ընտանիքներով, երեխաներով, ծերերով բոլորը դուրս են եկել փողոց հանուն Արցախի, հանուն Հայաստանի, հանուն հայ ժողովրդի»։

Սաղաթելյանն ասաց, որ այսօր ձերբակալել են Յուրի Խաչատուրովի որդուն՝ Իգորին. «Նիկոլն ամեն ինչ անում թուրքին դուր գալու համար։ Ժամանակին գործ հարուցեց Յուրի Խաչատուրովի դեմ, աշխատանքից ազատեց լավագույն կորպուսի հրամանատար Գրիգոր Խաչատուրովին, կրտսեր Խաչատուրովին է ձերբակալել, ու սա արել է մի բանի համար՝ թուրքին դուր գալու համար, քանի որ այդ մարդիկ թուրքին հաղթածներ են»։

Ընդդիմադիր գործչի խոսքով, այս օրերին իշխանությունն ու իր հատուկ հանձնարարություններով սպասարկուները կրկին փորձում են ժողովրդին մոլորեցնել, որ Ադրբեջանի ներկայացրած 5 առաջարկներին պատասխանել են վեց առաջարկով, դրանց մեջ ընդամենը խոսք կա Լեռնային Ղարաբաղի հայերի իրավունքների ու անվտանգության մասին։ 

«Փորձում են կրկին մոլերեցնել, կրկին ժողովրդի թիկունքում գնալ նոր գործարքների ու փորձել համոզել, որ մեզ սխալ եք հասկացել, պահում ենք Արցախի, Հայաստանի շահերը։ Ժողովուրդ՝ սուտ են ասում։ Մենք մի խնդիր ենք դրել, որ իրենք չեն լուծել.  ձևակերպումը հետևյալն է՝ հստակ պետք է հայտարարեն, որ չենք պատկերացնում որևէ լուծում, որի դեպքում Արցախը կլինի Ադրբեջանի կազմում։ Եթե այս ձևակերպումից մեկ բառ ավելի կամ պակաս, դա նիկոլություն է, կրկին ժողովրդին խաբել է, մենք ձեզ չենք հավատում, հետևաբար փորձ չանեք ժողովրդին մոլորեցնել։ Այո, Արցախը երբեք չի կարող լինել Ադրբեջանի կազմում»,- հայտարարեց Սաղաթելյանը։

Խոսելով վաղվա անելիքների մասին, նա ասաց, որ վաղը ժամը 08։00-ին սկսում են անհնազանդության ակցիաներ՝ նոր թափով ու ավելի կազմակերպված։

«Իշխանությանը հեռացնելու հանրային ճնշման  միակ ճանապարհը դա է։ Մենք պայմանավորվել ենք՝ պետք է հասնենք նրան, որ ոչ բաժիններում տեղ լինեն, ոչ ոստիկանական ուժերը հերիքեն, ոչ էլ որևէ կերպ հնարավոր լինել կասեցնել։ Այսօր բերման են ենթարկվել մոտ 600 հոգի, Երևանի բաժիններում տեղ չկար, քաղաքից դուրս էին բաժիններ տանում։

Այս գործը պետք է հասցնենք հաղթական ավարտի։ Բանաձևը հետևյալն է՝ այսօր ունեինք 60 խումբ, վաղը դարձնենք 100 խումբ, քաղաքի երթևեկությունը պետք է կաթվածահար անենք, պետք լինի՝ կշրջափակենք կառավարական շենքերը, պետք լինի՝ մետրոն, որքան շատ լինենք, այնքան մեծ գործողություն կանենք»,- ասաց Իշխան Սաղաթելյանը։