Ձեր վստահելի աղբյուրը

«Միասին ծանր ու դժվար գործ ենք սկսել, բայց վստահ եղեք, որ միասին այս գործն ավարտելու ենք հաղթանակով, որովհետև պինդ եք, ամուր ու վճռական եք, մենք միասնական ենք»,- Ֆրանսիայի հրապարակում հանրահավաքի ժամանակ հայտարարեց ՀՅԴ ԳՄ ներկայացուցիչ Իշխան Սաղաթելյանը՝ դիմել պայքարին միացած քաղաքացիներին։

Նա ասաց, որ վաղը առավոտյան 08․00-ին կրկին սկսում են բողոքի, անհնազանդության ակցիաները։

«Այլ ճանապարհ, այլ տարբերակ չկա։ Մենք մեր քայլերով, գործողություններով պետք է մեր թիվն ավելացնենք ու հասենքն այն նպատակին, ինչը մեր առջև դրել ենք»,- նշեց ընդդիմադիր գործիչը։

Ի.Սաղաթելյանի խոսքով, այսօր նորից փաստել են՝ այս շարժումը կասեցնել հնարավոր չէ. «Այսօր 600-ից ավելի բերման ենթարկվածներ ենք ունեցել, հիմա բոլորն  այստեղ են։ Պետք է համախմբենք, շատանանք ու այս գործը հասցնենք իր հաղթական ավարտին»։ 

Նա հրապարակեց` մայիսի 19-ին ժամը 08։00-ին որ վայրերից են շարժվելու խմբերը և որտեղ հավաքվեն քաղաքացիները․

Գարեգին Նժդեհի հրապարակ,

Կոմիտաս, եկեղեցու մոտ

Ավան, «Հարսնաքար» համալիրի մոտ

Նորքի զանգված՝ «Մեգամոլի» դիմաց

Սասունցի Դավթի արձանի դիմաց

15-րդ թաղամաս, Հանրապետական հիվանդանոցի այգում

Լենինգրադյան-Սեբաստիա խաչմերուկ

Ֆրանսիայի հրապարակ։

«Միացեք բողոքի ակցիաներին, որքան շատ, այնքան մեծ գործ կանեք։

Հոգնել չկա, հետքայլ չկա, նահանջ չկա։ Մինչև վերջ, մինչև հաղթանակ»,- ասաց Սաղաթելյանը։

Ընդդիմադիր գործիչը հիշեցրեց, որ վաղը  Հայաստան է ժամանելու Լիտվայի նախագահը, դիմեց շարժմանը միացած քաղաքացիներին՝ միասին գործ ունեն անելու, իսկ 19․00-ին կրկին հավաքվելու են Ֆրանսիայի հրապարակում։