Ձեր վստահելի աղբյուրը

«Հայ Ձմեռ պապ» բարեգործական հիմնադրամը 2021 թվականից սկսել «Հարգանքի և երախտիքի կրթամրցանակ՝  նվիրված մեր գոյամարտի հերոսների հիշատակին» գիտակրթական ծրագիրը: Կրթամրցանակների նպատակն է Արցախյան գոյամարտերում զոհված հերոսների հիշատակը հավերժացնել՝ նրանց անունները շաղկապելով կրթության և մշակույթի զարգացման գաղափարին։

«Վաչագանի, Վարդանի, Գևորգի, Էրիկների, Վահագնի, Ռուբենի, Սևակի, հերոս եզդիների (առայժմ այսքան կրթամրցանակներ ենք կարողացել բացել) անուններին, կենսագրություններին ու սխրանքների պատմությանը հաղորդակցվելն անգամ օգնում է, որ հասկանանք, թե ինչ ազնվակիրթ սերունդ ունենք։ «Մեզ թաղեցին, բայց չգիտեին, որ մենք սերմեր ենք»․ մեր ազգի ոսկի սերմերն են հողում քնած մեր տղաները, ու նրանցից, նրանց օրինակով ծլարձակելու է ապագայի քաղաքացին։

Հավերժ փառք իրենց՝ մեր ոսկի սերմերին»,- գրել է «Հայ Ձմեռ պապ» բարեգործական հիմնադրամի տնօրեն Արմինե Պետրոսյանը։

«Հայ Ձմեռ պապ» լրագրողական բարեգործական հիմնադրամը և ԵՊՀ ժուռնալիստիկայի ֆակուլտետը  երախտիքի և հարգանքի «ՈՍԿԻ ՍԵՐՄԵՐ» կրթամրցանակը նվիրվել է Արցախյան 44-օրյա պատերազմի հերոս, ֆակուլտետի մագիստրանտ, գրող-հրապարակախոս Վաչագան Մանուկյանի հիշատակին։

Կրթամրցանակի հովանավորը կանադահայ բարերար Արա Մուրադյանն է։ Կրթամրցանակի հանձնման արարողությունը կկայանա մայիսի 23-ին ԵՊՀ ժուռնալիստիկայի ֆակուլտետի լրագրող ազատամարտիկների լսարանում։

Մրցանակը նախատեսում է յուրաքանչյուր կիսամյակ 200000 (երկու հարյուր հազար) դրամի չափով աջակցություն տրամադրել ԵՊՀ ժուռնալիստիկայի ֆակուլտետի բակալավրիատի (առկա/հեռակա) այն ուսանողին (սկսած 2-րդ կուրսի 2-րդ կիսամյակից), որի տվյալները կհամապատասխանեն սահմանված չափորոշիչներին (բոլորին կամ գերակշիռ մասին)` առաջադիմություն, ստեղծագործական ակտիվություն,  նորարար միտք, քաղաքացիական հանձնառություն և  այլ։

Վաչագան Խաչիկի Մանուկյանը ծնվել է 1991 թ. Էջմիածին քաղաքում: Նա ծառայության ընթացքում պարգևատրվել է «Գարեգին Նժդեհ» մեդալով: Վաչագանը զոհվել է 2020 թվականի նոյեմբերի 8-ին՝ Շուշիի մատույցներում:

«Հայ Ձմեռ պապ» բարեգործական հիմնադրամի տնօրեն Արմինե Պետրոսյանը Panorama.am-ի հետ ավելի վաղ զրույցում մանրամասն ներկայացրել էր, թե որն է ծրագրի հիմնական նպատակը.
«Կրթությունն ու գիտությունն են այն հիմնարար հենասյուները, որոնց վրա պետք է կառուցվի Հայաստանի առաջընթացի շենքը։ Այդ շենքը կկառուցվի անպայմա՛ն։ Դրան է ուղղված «Հայ Ձմեռ պապ» բարեգործական հիմնադրամի նոր՝ «Հարգանքի և երախտիքի կրթամրցանակ՝ նվիրված մեր գոյամարտի հերոսների հիշատակին» գիտակրթական նախագիծը, որի նպատակն է

• հնչեցնել Հայրենիքի պաշտպանության համար իրենց կյանքը զոհաբերած հերոսների անունները, ներկայացնել նրանց սխրանքը,
• այդ նպատակն իրականացնել՝ խրախուսելով գիտակրթական հաստատություններում սովորող օժտված երիտասարդներին,
• վերահաստատել մեր ժողովրդի համար ավանդաբար ազգային արժեք համարվող կրթության և գիտության զարգացման կարևորության գիտակցումը՝ կապելով այն նվիրյալների հերոսացման օրինակների հետ,
• կամուրջ ստեղծել պատերազմի հերոսների ընտանիքների և առաջադեմ ուսանողների միջև, պարբերական փոխայցեր և այլ միջոցառումներ կազմակերպել,
• նպաստել «Հարգանքի և երախտիքի կրթամրցանակի» մոդելի ձևավորմանը և գաղափարի տարածմանը,
• պատկան մարմինների, բարեգործական կազմակերպությունների/անձանց ուշադրությունը վերստին ուղղորդել դեպի զարգացման ծրագրեր և գիտահեն տնտեսություն կառուցելուն միտված ներդրումներ»։