Ձեր վստահելի աղբյուրը

«Երեկ տեսանք ոստիկանական բարբարոսության ամենաբարձր մակարդակը։ Դա նորից մի քանի ոստիկաններ էին։ Խոսքը 60-80 ոստիկանի մասին է»,- Ֆրանսիայի հրապարակում հանրահավաքի ժամանակ ասաց «Հայաստան» խմբակցության պատգամավոր Արամ Վարդևանյանը։

Նա նշեց, որ նրանցից յուրաքանչյուրին ֆիքսում են, յուրաքանչյուրի պատասխանատվությունը անխուսափելի է  լինելու։

«Բայց ժողովուրդը պահանջ դրեց, որ դրանց արդեն պետք է մեկուսացնեն ու այսօր իրենք մեկուսացած էին, այսօր մեր քայլերթը լրիվ ուրիշ էր, ուրիշ էր ձեր շնորհիվ»,- ասաց ընդդիմադիր գործիչը։

Նա խոսեց նաև 44-օրյա պատերազմում նահատակված զինծառայող Մխիթար Գալեյանի հոր ու հորեղբոր նկատմամբ իրավապահ մարմինների գործողություններից։ Վարդևանյանը հիշեցրեց, որ երկուսին էլ «իրավապահ մարմինները» ձերբակալել էին։

«Ամոթ, ամոթ» վանկարկեցին հրապարակում հավաքված քաղաքացիները։

«Ժողովրդի, բոլորիս ճնշման արդյունքում Մխիթար Գալեյանի հոր ձերբակալումը երեկ վերացվեց։ Բայց Մխիթարի հորեղբորը ձերբակալված պահեցին։ Դատարանը քննել է ձերբակալման դեմ բողոքը, հիմա գտնվում է խորհրդակցական սենյակում որոշում կայացնելու։ Հիմա միասնական ասենք, որ չի կարող բարոյականության ճգնաժամ լինել, չի կարող նման դեպքերով մարդ անիմաստ կալանավորվել, չի լինելու այդպես, պետք է ազատ արձակվի»,- ասաց Արամ Վարդևանյանը։

Ինչ վերաբերում է ավելի վաղ իր կողմից բարձրացված մեկ այլ առաջարկին, որը վերաբերում էր գույքահարկին, նա ասաց, որ այս իշխանության օրոք ընդունված ռեֆորմը պետք է փոխվի. «Այն մարդը, ով տարիներով տատիկի, պապիկի հետ սկսած ապրել է մի շենքում, այդ շենքն էլիտար չէ, ինչո՞ւ համար իր գույքահարկը բարձրանա, կամ ժառանգություն ստացած սեփական տուն ունի, ինչո՞ւ գույքահարկը բարձրանա։ Գույքահարկը բարձրանալու է էլիտար շենքների, թանկ տների համար։ Նորմալ, սովորական պայմանների համար ինչո՞ւ պետք է բարձրանա։ Չի բարձրանալու, չի լինելու այդպես»։

Վարդևանյանն ասաց, որ իրենք ունեն միասնական հանձնառություն՝ պետք է ստեղծեն այն մթնոլորտը, որ այլևս անպատասխանատվություն կամ պատասխանատվությունից խուսափելու վիճակ  ոչ մեկի մոտ չլինի։

«Հայ մարդու տեսակն այդպիսին չէ, հայ մարդու տեսակը՝ սուտը, բամբասանքը, հայհոյանքը, պառակտումը խրախուսող տեսակ չէ։ Հայ մարդը պատասխանատվություն վերցնող տեսակ է ու այն իշխանությունը, որը  պատասխանատվությունից փախնող է, հայ ժողովրդին պառակտող է...

Պառակտում չի լինելու, այդ վարքագիծը չի լինելու։ Մենք միասին այս հանձնառությունը հասցնելու ենք իր ավարտին։ Միասին գնալու ենք մինչև վերջ»,- ասաց ընդդիմադիր գործիչ Արամ Վարդևանյանը։