Ձեր վստահելի աղբյուրը

ՀՀ քննչական կոմիտեի զինվորական քննչական գլխավոր վարչության դիմաց 44-օրյա պատերազմում նահատակված զինծառայողների հարազատները դադարեցրեցին իրենց բողոքի ակցիան այն բանից հետո, երբ  նրանց մոտեցավ զոհված զինծառայող Մխիթար Գալեյանի հորեղբայրը՝ Արթուր Գալելանը, ով մայիսի 18-ին ձերբակալվել է։ Նա խնդրեց ծնողներին՝ գնալ տուն։

«Գնում եք տուն, հանգստանալու, վաղը բոլորիդ սպասում եմ դատարանում»,- ասաց  նա։

Ծնողների հետ ՀՀ քննչական կոմիտեի զինվորական քննչական գլխավոր վարչության դիմաց է «Հայրենիք» կուսակցության ղեկավար Արթուր Վանեցյանը։

«Եթե Արթուրը հիմա ասում է՝ մնում ենք, ուրեմն մնում ենք, եթե ասում է չենք մնում, ուրեմն Արթուրի խնդրանքն ընդունում ենք ու շարժվում։ Վաղը մինչև 20։30-ն պետք է դատական նիստ նշանակվի։ Բոլորս գնալու ենք դատարան։ Համոզված եմ, որ այդ գործը որևէ ապագա չունի, Արթուրը վաղը կլինի ազատության մեջ»,- ասաց Արթուր Վանեցյանը։

Նա նշեց, որ փաստաբանը մտնելու է դատարան ձերբակալման անհամաչափությունը վիճարկելու պահանջով, այդ միջնորդությունն, ըստ օրենքի, պետք է լսվի 24 ժամվա ընթացքում, այսինքն վաղը մինչև 20։30 այդ դատը պարտավոր են նշանակել։

«Վաղը բոլորս իրար հետ ավելի մեծ կազմով գնում ենք դատարան։ Կարծում եմ՝ դատարանն այնքան խելացի կլինի, որ օրինաչափ որոշում կկայացնի։ Իմ կարծիքով, այս «հանցագործությունը» օդ է, որն արվել է էլի, իմ կարծիքով, մեկ նպատակով՝ փորձել  լռեցնել ոտքի կանգնած ծնողներին։ Եթե չստացվի, բոլորս զինվորի պես գնում ենք մինչև վերջ, կորցնելու որևէ բան չունենք։

Մենք Արթուրին մենակ չենք թողնելու»,- ասաց Արթուր Վանեցյանը։

Հիշեցնենք, որ 44-օրյա պատերազմում զոհված զինծառայողների հարազատները ՀՀ քննչական կոմիտեի զինվորական քննչական գլխավոր վարչության  բակում էին՝ պահանջելով ազատ արձակել զոհված զինծառայող Մխիթար Գալեյանի հորը՝ Գարիկ Գալեյանին և հորեղբորը՝ Արթուր Գալեյանին։
Գարիկ Գալեյանն ազատ է արձակել արգելանքից, վերջինիս նկատմամբ որպես խափանման միջոց կիրառվել է ստորագրություն չհեռանալու մասին։ Արթուր Գալեյանը ՀՀ քրեական օրենսգրքի 327.6-րդ հոդվածի 3-րդ մասի 1-ին կետով, 137.1-րդ հոդվածի 1-ին մասով և 316-րդ հոդվածի 1-ին մասով որպես մեղադրյալ է ներգրավել, վերջինս ՀՀ քրեական դատավարության օրենսգրքի 130-րդ հոդվածով սահմանված կարգով ձերբակալվել է և միջնորդություն է ներկայացվել Երևան քաղաքի ընդհանուր իրավասության դատարան՝ նրա նկատմամբ կալանավորումը որպես խափանման միջոց կիրառելու համար:

Քննչական կոմիտեից ավելի վաղ հայտնել էին,  թե «մայիսի 17-ին մի խումբ անձինք, սահմանված կարգի խախտմամբ, մուտք են գործել ՀՀ ՊՆ N զորամասի տարածք, որի ընթացքում չենթարկվելով զորամասի տարածքը լքելու՝ զորամասի հրամանատարի սպառազինության գծով տեղակալ, գնդապետի օրինական պահանջին, ծառայողական պարտականությունները կատարելու կապակցությամբ, հայհոյել են, քաշքշել և բռնություն գործադրել նրա նկատմամբ՝ պլաստմասե շշով հարվածելով դեմքին: Նախաքննության ընթացքում իրականացված անհետաձգելի միջոցառումների արդյունքում պարզվել են իշխանության ներկայացուցչի նկատմամբ առերևույթ բռնություն գործադրած և ծանր վիրավորանք հասցրած անձանցից երեքի ինքնությունը, ովքեր Գարիկ և Արթուր Գալեյան եղբայրներն են, ինչպես նաև՝ քաղաքացի Ազգուշ Մարտիրոսյանը:

Նրանցից մեկը՝ Գարիկ Գալեյանը, ձերբակալվել է և ձեռք բերված բավարար ապացույցների համակցությամբ նրան մեղադրանք է առաջադրվել՝ ՀՀ քրեական օրենսգրքի 327.6-րդ հոդվածի 3-րդ մասի 1-ին կետով (Բռնություն գործադրելով կամ դա գործադրելու սպառնալիքով Զորամաս կամ հատուկ պահպանվող զինվորական այլ տարածք ապօրինի մուտք գործելը), 137.1-րդ հոդվածի 1-ին մասով (Անձին ծանր վիրավորանք հասցնելը` հայհոյելը կամ նրա արժանապատվությունն այլ ծայրահեղ անպարկեշտ եղանակով վիրավորելը) և 316-րդ հոդվածի (Իշխանության ներկայացուցչի նկատմամբ բռնություն գործադրելը)1-ին մասով»: