Ձեր վստահելի աղբյուրը

«Այսօր Երևանում շարունակվել են բողոքի անհնազանդության ակցիաները։ Բերման ենթարկվածների թիվն ու այն բռնությունները, որոնք կային նախորդ երկու օրերին, գոնե այս պահի դրությամբ այդ ծավալներով չի եղել։ Փոփոխություն տեսնում եմ»,- լրագրողների հետ զրույցում ասաց ՀՅԴ ԳՄ ներկայացուցիչ Իշխան Սաղաթելյանը՝ պատասխաելով հարցին՝ արդյո՞ք երեկ ոստիկանապետի հետ հանդիպումից հետո ոստիկանների գործողություններում փոփոխություն նկատվում է։

Նա նշեց, որ այն, ինչ երեկ էր տեղի ունենում՝ մարդկանց մայթերից, այգիներից, փողոցներից ձերբակալում, բռնի ուժի կիրառում, փաստ է, որ այսօր տեղի չի ունեցել։

Երեկ հանրահավաքի ժամանակ Ի. Սաղաթելյանը հայտարարել էր, որ մայիսի 16-ին ոստիկանությունը ստացել է 2 մլրդ 180 մլն դրամ պարգևավճար, մոտ 5 մլն դոլար՝ պաշտոնական թվերով. «Մայիսի 11-ին էլ ևս 700 մլն դրամ պարգևավճար է ստացել: Մեկ շաբաթվա մեջ մոտ 3 մլրդ դրամ, շուրջ 6.5 մլն դոլար Նիկոլը ոստիկանությանը պարգևատրել է այս ապօրինությունները գործելու համար»։

Հարցին՝ ինչո՞ւ որոշեցին պարգևավճարներ տալ ոստիկաններին, նկատեցին, որ շարժումն ավելի է ակտիվանում, ընդդիմադիր քաղաքական գործիչը պատասխանեց. «Իհարկե։ Դրանով փորձում են ոստիկանությանը շողոքորթել, գնել և այդ ծառայությունների դիմաց վճարել։ Ակնհայտ փաստ է։
Ես գտնում եմ, որ ոստիկանությունն, իրոք,  պետք է ստանա արժանապատիվ աշխատավարձ, ոստիկանությունը պետք է վճարվի  պետությանը ծառայելու իր գործառույթների համար, ոչ թե  ստանա պարգևավճար մեկ խելագարի ապօրինի հրահանգները կատարելու  համար, և, դժբախտաբար,  ոստիկանության մեջ եղել են մարդիկ, առնվազն անցնող օրերի ընթացքում, որ նման  դրսևորումներ ցուցաբերել են»։

Սաղաթելյանի խոսքով, ակնհայտ է, որ րոպե-րոպե իրենց շարժումը թափ է հավաքում, իրենց միանում են հանրության տարբեր խավերի և շերտերի ներկայացուցիչներ։

«Շարժումն իր ծավալով, ինտենսիվությամբ, քայլերի, գործողությունների մասշտաբով բացառիկ է։ Ակնհայտ է, որ Հայաստանի  նորանկախ պատմության մեջ այս ծավալի, մասշատբի ու այս ինտենսիվությամբ շարժումներ քիչ են եղել, կամ գրեթե չեն եղել։ Սովորաբար մի քանի օր է տվել, բայց արդեն 24-րդ օրն է մենք ամեն օր երթեր, ցույցեր, հանրահավաքներ ենք իրանացնում Երևանում, մարզերում։ Բացառիկ երևույթ է,  որի հետ հաշվի չնստելն ու չնկատելն…»,- ասաց Իշխան Սաղաթելյանը։

Խոսելով կալանավորված Դաշնակցական երիտասարդների մասին և արդյո՞ք նրանց կալանավորումը չի վախեցրել այլ երիտասարդների դուրս գալ փողոց, նա ասաց. «Փորձել Դաշնակացական երիտասարդներին վախեցնել կալանավորմամբ՝ լուրջ չէ։ 11 Դաշնակցական կալանավորված է, ավագները երեք պատերազմի մասնակից են, երիտասարդները վերջին մեկ կամ երկու պատերազմի։ Այն մարդն, ով պատրաստ է  կայնքը զոհել հայրենիքի համար, այդ մարդուն վախեցնելով կալանքով, այս իշխանություններն իրենց արշինով են փորձում չափել։

Տղերքը ոչ միայն նահաջող, վախեցող չեն, շատ ավելի պինդ են, իսկ իրենց կալանավորելը մեզ ստիպում է ավելի  վճռական լինել մեր պայքարում, ցույց տալու, որ որևէ բան չի կարող մեր շարժումը կասեցնել։ Իհարկե, փորձում են առավել աչքի ընկողներին, կազմակերպիչներին  տարբեր կերպ, տարբեր շինծու մեղադրանքներով մեկուսացնել, բայց չի ստացվելու, քանի որ այնքան շատ ենք, ո՞ր մեկին մեկուսացնեն։

Այս ցասումը,  մարդկանց կամքը, վճռականությունը  կարող է մի օր նվազի, ավելանա,  մի օր հասնի իր պիկին և այդ ժամանակ իրենց հեռացնելը դառնալու է անխուսափելի։ Այդ օրը շատ հեռու չէ։ Այս ցասումը պարզապես հնարավոր չէ կասցնել»։

Անդրադառնալով ՔՊ-ական պատգամավորների հայտարարություններին, Սաղաթելյանը նշեց. «Այն, ինչ խոսում են, թող մտածեն, որ դրա համար պատասխան են տալու։ Թող մի հատ նայեն իրենց անցյալը, տեսնեն իրենց ներկան ու մտածեն ապագայի մասին։ Խոսքը վերաբերում է ՔՊ-ական մի քանի պատգամավորներին, իսկ մնացածը ազատ տեղ ունեն նահանջելու, պատասխանատվություն չկրելու, այդ հնարավորությունը իրենց լիարժեք տրված է»։ 

ՀՅԴ ԳՄ ներկայացուցիչը հայտարարեց, որ դատախազությունը մեկ անելիք ունի՝  զոհված ծնողները, անցած տարվանից Արծվիկ Մինասյանն ու Հակոբ Մարտիրոսյանը կոնկրետ պահանջով դիմել են՝ պետական դավաճանության հոդվածով կալանավորել Նիկոլ Փաշինյանին. «Դատախազությունը շարունակում է դեռ  ծառայել օրվա իշխանությանը, բայց կարծում եմ՝ դա երկար չի տևի: Ամենախայտառակությունն այն է, որ շարունակում են այս հալածանքների մի մասն իրականացնել դատախազության ձեռքով»: