Ձեր վստահելի աղբյուրը

Փաստաբան Ալեքսանդր  Կոչուբաևը ֆեյսբուքյան իր էջում հրապարակել է անազատության մեջ գտնվող ակտիվիստ Նարեկ Մանթաշյանի նամակը.

«Հարգելի՛ հայրենակիցներ,

Արդեն երկրորդ անգամ եմ կոչով դիմում ժողովրդիս քրեակատարողական հիմնարկից։ Մինչ ժողովրդիս դիմելը, իմ փաստաբաններին ու քաղաքական թիմակիցներիս կոչ եմ անում դադարեցնել իմ առողջական վիճակով պայմանավորված բոլոր միջնորդություններն ու գործընթացները։

Ընկերներիս, հարազատներիս, թիմակիցներիս ու, առհասարակ, ոտքի ելած ու պայքարող իմ ժողովրդիս տեղեկացնում եմ, որ ես ամենաառողջն եմ, ամենաուժեղն ու ամենաչկոտրվողը։

Այդպիսին եմ, քանի որ գիտեմ՝ դուք ոտքի եք կանգնել մեր երկրի ազատության, հզորության համար, թուրքական լծից մեր հայրենիքը մաքրելու համար։  Տեսնելով ձեր անկոտրում պայքարը՝ ես այստեղ՝ 4 պատերի ներսում, ավելի ազատ եմ ինձ զգում, քան մարդիկ, ովքեր հրահանգներ ստանալով՝ որոշում են ինձ պահել անազատության մեջ։

Իմացեք, որ հարկ եղած դեպքում պատրաստ եմ ևս 5 տարի լինել անազատության մեջ, միայն թե մեր հայրենիքը դուրս գա այն դժոխային մղձավանջից, որի մեջ այն մտավ 2018-ին։ Հայտնի պատումի նման, ինձ կալանավորել են, բայց իմ մանկահասակ զավականերն են իմ փոխարեն պայքարի շարքերում։ Այդպես է լինելու միշտ, քանի որ հայրենիքից թանկ ու բարձր ոչինչ չկա իսկական հայի համար։

Տեղեկացնում եմ, որ ինձ մոտ ամեն ինչ լավ է, մի մտածեք․․․ի՞նչ է իմ ֆիզիկական ազատությունը, եթե իմ երկիրն է վաղուց բանտարկված այս թրքապաշտ ու դավադիր իշխանությունների կողմից։

Պատիվ է ինձ համար կիսել երկրիս անազատությունը իմ անազատության հետ։ Ուստի, եթե ցանկանում եք ինձ տեսնել ազատության մեջ, առաջին հերթին մեր երկիրն ազատագրեք։
Ազատագրեք՝ առանց հետ նայելու, վճռական մենակի հոգեկերտվածքով։
Պարտության տեղ այլևս չունենք։

Ես հավատում եմ մեր հաջողությանը ու ողջ իմ գիտակցությամբ զորավիգ եմ Ձեզ։
ԶԱՐԹՆԻ՛Ր, ԼԱՈ՛․․․

Սիրով Ձեր՝
Նարեկ Մանթաշյան»։