Ձեր վստահելի աղբյուրը

Նիկոլ Փաշինյանի հրաժարականը պահանջող և Հայաստանի ու Արցախի անվտանգությամբ մտահոգ քաղաքացիները նախագահական նստավայրից  երթով շարժվեցին Հանրապետության հրապարակ՝ «Մարիոթ» հյուրանոց։

Հյուրանոցի մոտ ՀՅԴ երիտասարդական միության կենտրոնական վարչության ներկայացուցիչ Սևակ Նազարյանը հայտարարեց, որ իրենց տեղեկություններով այսօր այստեղ տեղի է ունենալու քննարկում, որին մասնակցելու է Նիկոլ Փաշինյանն ու ՀՀ-ում ԱՄՆ դեսպանը։

«Մենք եկել ենք այստեղ փոխանցելու մեր հստակ ուղերձը, որ այն մարդը, ով  երկրում տեղի ունեցողը կոչում է  ժողովրդավարական գործընթաց, Հայաստանում անելիք չունի։ Եկել ենք Նիկոլ Փաշինյանին ասելու, որ դու Հայաստանում իշխանություն չունես»,- ասաց նա։ 

Ս. Նազարյանի խոսքով, մարդիկ, ովքեր հավաքվել են այստեղ, աչք ենք փակում այս իշխանության բոլոր հանցանքների վրա։ 

ՀՀԿ ԵԿ Արտաքին կապերի հանձնաժողովի նախագահ Լիլիթ Բեգլարյանն ասաց, որ այս հյուրանոցում անցկացվում է «Հայկական ժողովրդավարությունը» թեմայով ֆորում:

«Մենք եկել ենք հասկանալու, թե այս մարդիկ, որ հավաքվել են այստեղ, որտե՞ղ են տեսնում ժողովրդավարություն։ Այս օրերին «Դիմադրության» շարժման ընթացքում եղել են հարյուրավոր ապօրինի բերման ենթարկումներ, ձերբակալություններ, մարդու իրավունքների, արժանապատվության խախտումներ, լրագրողների աշխատանքի սահմանափակում, լրագրողների նկատմամբ բռնություն։ Եկել ենք  հասկանալու՝  արդյոք նրանք այդ ամենը քննարկելու են այստեղ։ 

Նրանց օրակարգը շատ կարևոր է։ Ժողովրդավարությունը շատ կարևոր է։ Բայց արդյո՞ք այն համապատասխանում է իրականությանը։ Ուզում ենք ասել, որ դուրս գան ու տեսնեն այստեղ հավաքված մարդկանց։ Սա է իսկական ժողովրդավարության բաիստիոնը, ոչ թե այն, ինչ- որ դուք եք ներկայացնում։ Դուրս եկեք և ականջալուր եղեք այստեղ հավաքված մարդկանց։ Արդյո՞ք այս օրերի ընթացքում փորձել եք հասկանալ այս մարդկանց, նրանց բարձրաձայնած խնդիրները։ Այո, մենք կողմ ենք  ժողովրդավարական արժեքներին, դրանք են մեր արժեքները, այստեղ հավաքված մարդկանց արժեքները,  բայց  դրանք դուք չեք պաշտպանում, պաշտպանում են այստեղ կանգնած մարդիկ, որոնք ամեն օր պայքարում են Հայաստանի ու Արցախի համար»,- ասաց Լ. Բեգլարյանը։ 

«Առանց Նիկոլ Հայաստան», «առանց թուրքի Հայաստան», «Նիկոլ դիկտատոր» վանկարկում են հյուրանոցի դիմաց հավաքված քաղաքացիները։ 

«Հայաստան» դաշինքից հայտնում են, որ «Մարիոթ» հյուրանոցում  Freedom House միջազգային կազմակերպությունն անցկացնում է «Հայկական ժողովրդավարությունը» թեմայով ֆորում:
Այնտեղ նախատեսված է Նիկոլ Փաշինյանի ելույթը, միջոցառմանը ներկա են ԵՄ և ԱՄՆ դեսպանները, «ինչպես նաև իրավապաշտպան ներկայացող Նիկոլ Փաշինյանի անձնական օգտագործման մի քանի կազմակերպությունների ներկայացուցիչներ»: