Ձեր վստահելի աղբյուրը

«Այսօր դուք տասնյակ հազարներով ներկա գտնվելով այստեղ՝ ևս մեկ անգամ հաստատեցիք, որ վարչապետի աթոռ զբաղեցնող անձը հայ ժողովրդի և Հայաստանի անունից բանակցություններ վարելու որևէ մանդատ չունի»,-«Դիմադրության» շարժման հանրահավաքում հայտնեց ԱԺ փոխնախագահ Իշխան Սաղաթելյանը:

Նա ասաց, որ Ադրբեջանի 5 առաջարկներին հայկական կողմի ներկայացրած 6 առաջարկները ոչինչ չասող, դիվանագիտորեն սխալ ձևակերպած և հայ ժողովրդի շահերից չբխող առաջարկներ են, որոնք Ֆրանսիայի հրապարակում գտնվողները ամբողջությամբ մերժում են:

Իշխան Սաղաթելյանը հայտնեց, որ իրական, արժանապատվության հասնելու ընդդիմության րմոտեցումներն հստակ են և ընթերցեց դրանք.

«44-օրյա պատերազմից հետո ստեղծված իրավիճակում Հայաստանին մարտավարական առումով անհրաժեշտ է՝

-զերծ մնալ շտապողական, վտանգավոր և ճակատագրական կտրուկ քայլերից՝ մինչև աշխարհաքաղաքական տագնապալի իրավիճակի հարաբերական կայունացումը և հստակեցումը,

-ձևավորել անվտանգային այնպիսի մթնոլորտ, որը կանխատեսելի և ընկալելի կլինի ռազմավարական դաշնակցի և տարածաշրջանային ու միջազգային այլ կարևոր գործընկերների համար՝ նոր աշխարհակարգի ստեղծման պայմաններում անվտանգային հայանպաստ մեխանիզմերի ապահովման նպատակով,

-ռազմական, ռազմաարդյունաբերական տեխնոլոգիական, տնտեսական և ենթակառուցվածքային բոլոր ուղղություններով անհապաղ մշակել և կյանքի կոչել հեռանկարային և ռազմավարական հայեցակարգ,

-համախմբել համայն հայության ողջ ներուժը և սփյուռքը պետք է դառնա մասնակիցն ու պատասխանատուն համահայկական օրակարգի խնդիրների կենսագործման համար»:

Սաղաթելյանի փոխանցմամբ՝ ընդդիմությունը համոզված է, որ իրական խաղաղության, հաշտեցման և համագոյակցության ապահովմանը պետք է անպայմանորեն նախորդեն չլուծված խնդիրների վերաբերյալ փոխհամաձայնությունները:

«Ուստի Հայաստանը պետք է առաջարկի հայ-ադրբեջանական բանակցությունների օրակարգը բաժանել երկու փուլի՝ հարաբերությունների կարգավորման սկզբունքների հստակեցում ու համաձայնեցում և  բուն խաղաղության պայմանագրի շուրջ բանակցություններ, անհրաժեշտության դեպքում՝ պայմանագրի կնքում»,-հայտարարեց ընդդիմության ներկայացուցիչը և, հիշեցնելով, որ ընդդիմությունը միշտ էլ կողմ է եղել խախաղությանը՝ հայտարարեց, թե այն չպետք է լինի հայրենազրկման, հայ ժողովրդի կենսական շահերի զիջման գնով, այլ պետք է լինի արժանապատիվ խաղաղություն:

Նա ասաց, որ հայանպաստ դիրքերից հանդես եկող նոր իշխանությունը կարևոր քայլեր պետք է ձեռնարկի:

«Երբ ասում եմ Հայաստանի Հանրապետություն, հայկական կողմ այդտեղ Նիկոլ չկա, նա կապ չունի ՀՀ-ի և հայկական կողմի հետ:

Նախ պետք է երկու կողմերի հավատարմությունը միջազգային հիմնարար սկզբունքներին, այդ թվում՝ տարածքային ամբողջականության, ազգերի ինքնորոշման իրավունքի և ուժի, կամ ուժի սպառնալիքի չկիրառման հադեպ: Մինչև հավանական խաղաղության պայմանագրի կնքումը պետք է առաջնային կերպով հասցեագրվեն Արցախի Հանրապետության տարածքների դե օկուպացիայի և ինքնորշաման իրավունքի հիման վրա Արցախի Հանրապետության վերջնական իրավական կարգավիճակի որոշման հարցերը՝ ԵԱՀԿ Մինսկի խմբաի համանախագահության հովանու ներքո: ՀՀ-ի համար ուղենիշային պետք է լինի ԳԽ-ի 1992 թվականի հուլիսի 8-ի՝ Արցախի որևէ կարգավիճակ Ադրբեջանի կազմում բացառող որոշումը:

Ուժի կիրառմամբ կամ դրա սպառնալիքի օգտագործմամբ սահմանագծման և սահմանազատման գործընթացը միջազգային իրավունքի կոպտագույն խախտում է: Նախքան սահմանագծման և սահմանազատման գործընթացի մեկնարկը Ադրբեջանը պետք է դուրս բերի իր զորքերը ՀՀ-ի ինքնիշխան տարածքից:

Հայաստանի և Ադրբեջանի միջև սահմանազատման և հետագայում նաև սամանագծման գործընթացները պետք է մաս կազմեն հակամարտության համապարփակ, խաղաղ կարգավորման գործընթացին՝ բացառելով առանց Հայաստանի հետ հուսալի կամպի Արցախի նակլավային վիճակը:

Որպես բանակցությունների մեկնարկ և լարվածության մթնոլորտի թուլացում Ադրբեջանը պետք է վերադարձնի բոլոր ռազմագերիներին, պատանդներին և ապօրինի պահվող անձանց: Հարգելի հայրենակիցներ մենք վստահ ենք, որ այս իրատեսական մոտեցումը աջակցություն կստանա, միջազգային իրավունքների դիրքերից հանդես եկող և Հարավային Կովկասում կայունությամբ և խաղաղությամբ իրապես շահագրգիռ մեր միջազգային գործընկերներին:

Միևնույն ժամանակ մենք հստակ ուղերձ ենք հղում ողջ միջազգային հանրությանը, որ որևէ պարագայում թույլ չենք տալու հայ ժողովրդի ազգային պետական շահերը զոհաբերել աշխարհաքաղաքական հավակնություների սպասարկմանը և անհարկի միջամտել Հայաստանի ներքին գործերին»,-ասաց Սաղաթելյանը:

Նա նկատեց, որ իր ներկայացրած սկզբունքները միգուցե հանրահավաքային չէին, բայց ընդդիմության դիրքորոշումն անհրաժեշտ էր հնչեցնել, որպեսի և միջազգային հանրությունը և ժողովուրդը հասկանա, գիտակցի, տեղեկանա մանրամասներին, որ խնդրի լուծման ամբողջական պատկերացումները և բանաձևումներն ընդդիմությունը ունի և դրան հասնել հնարավոր է:

ՀՅԴ ԳՄ ներկայացուցիչն ասաց, որ Թուրքիան և Ադրբեջանը շտապում են, քանի որ վախենում են, որ Նիկոլ Փաշինյանը շուտով գնալու է և հայտարարեց, որ նրանց մտահոգությունն տեղին է, քանի որ վերջինիս իրոք հեռացվելու են: