Ձեր վստահելի աղբյուրը

«Արդյո՞ք մենք Տիգրան Մեծի սերունդն ենք…Իսկ ո՞ւմ տվեցինք Տիգրան Մեծի գահը… Ամոթ մեզ»,- Ֆրանսիայի հրապարակում  ժողովրդին դիմեց Սիսական ջոկատի հրամանատար Աշոտ Մինասյանը:

Նա հայտարարեց, որ այսօր իշխանության եկածներն իրենց հետ բերել են մարդկանց, որոնք ունակ են նսեմացնելու բոլոր՝ երկիրը պաշտպանելու ունակ հերոսներին։

«Ով է այն մայորը, այն ստախոսը, որը կարողացել է հարվածել արցախյան երեք պատերազմների հրամանատարին: Արայիկ Մուրադյանը իմ զինակից ընկերն է, որը երկու պատերազմ անցել է որդիների հետ, մեկ պատերազմ էլ՝ եղբոր: Այսօր այստեղ գտնվելով՝ նա նույնպես պայքարում է իր ազգի փրկության համար:

Ո՞վ է ոստիկանության այն ստախոս ներկայացուցիչը, որը սուտ ցուցմունք է տվել Խաչատուրովի հերոսածին ընտանիքի հանդեպ և այդ սուտ հաղորդման հետևանքով այսօր բանտում է Իգոր Խաչատուրովը:

Այսօր նույն է, ինչ Մխիթար Սպարապետի գլուխը կտրածին բերեին նշանակեին երկրի սպարապետ, որովհետև սրանից ամիսներ առաջ երկրի պաշտպանության նախարար նշանակեցին այն մարդուն, որը դանակահարել էր իր հրամանատարին: Այդ պատճառով էլ երկրի վիճակն այսպիսին է»:

Աշոտ Մինասյանը դիմեց հայրենակիցներին՝ կոչ անելով գալ Ֆրանսիայի հրապարակ:

«Որտե՞ղ են այն ղեկավարները, որոնք սպանեցին սերմացու տղերքին, դրեցին հողը, որ չծլեն:
Այս անփառունակ իշխանությունը կարողացավ ամլացնել 12 հազար տղայի, որպեսզի այդ սերմը չծլի»,-ասաց ազտամարտիկը և հարցրեց, թե ինչու այդ տղաների բարեկամները պայքարի հրապարակում չեն:

Սիսական ջոկատի հրամանատարը համոզմունք հայտնեց, որ սկսված պայքարը հասնելու է իր տրամաբանական ավարտին: