Ձեր վստահելի աղբյուրը

«Բոլորիս մոտ մտահոգություն է, թե ինչ է Փաշինյանը «բանակցելու»  Բրյուսելում։ Ավելի ճիշտ կլինի ասել՝ ինչ են Բրյուսելում պարտադրելու Փաշինյանին»,- Ֆրանսիայի հրապարակում «Հայաստանի առջև կանգնած մարտահրավերները և լուծումները» թեմայով քննարկմանն ասաց «Հայաստան» խմբակցության պատգամավոր Էլինար Վարդանյանը։

Նա նշեց, որ Փաշինյանը գնում է Հայաստանի անունից պայմաններ և պահանջներ ընդունելու և վերադառնալու։ 

Խոսելով մարտահրավերների մասին, նա ասաց, որ ամենալուրջ ներքին մարտահրավերներից է հասարակության մոտ եղած խորը ատելությունը։

«Այս իշխանություն համարվող խմբակը չորս տարում կարողացավ այն վիճակի հասցնել մեր հասարակությունը, որ չարությունն ու ատելությունը դարձել է  այսօրվա հասարակությանը մշտապես ուղեկցող գործոնը։

Ամենալուրջ մարտահրավերներից պետք է լինի վերացնել այն չարությունը, որը սերմանել են այս իշխանությունները։ Այդ ատելությունը կարող է պայթել մի տեղ, որտեղ մենք ինքներս էլ չենք պատկերացնում։ Մեր խնդիրը պետք է լինի հասարակության մեջ ստեղծել համերաշխության մթնոլորտ»,- ասաց ընդդիմադիր գործիչը։ 

Նա նշեց, որ հաջորդ մարտահրավերը, որը առկա է մեր պետությունում՝ ժողովորդավարության իսպառ բացակայությունն է։

«Հայաստանում այսպիսի հեղհեղուկ, կոտրված ժողովրդավարություն դժվար էր պատկերացնել»,-ասաց Էլինար Վարդանյանը։

Քննարկումն ամբողջությամբ՝ տեսանյութում։