Ձեր վստահելի աղբյուրը

«Ինչո՞ւ են քրեական հետապնդման մարմինները 2 տարի անգործություն դրսևորում և Փաշինյանի հանդեպ պետական դավաճանության փաստով գործ չեն հարուցում։ Բոլոր գործողությունները միտված է միայն ու միայն սա խափանելուն»,- Վերաքննիչ քրեական դատարանում հայտարարեց փաստաբան Հակոբ Մարտիրոսյանը Նիկոլ Փաշինյանի կողմից պետական դավաճանության հատկանիշներով քրգործ հարուցելու պահանջով բողոքի քննությանը։

Նշենք, որ բողոքը վերաբերում է նախկին դատախազ Հակոբ Մարտիրոսյանի և «Հայաստան» խմբակցության պատգամավոր Արծվիկ Մինասյանի՝ 2021թ. հունիսին ներկայացված հանցագործության մասին հաղորդմանը։ Մասնավորապես, նրանք պահանջում են քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ։

Բողոքաբերներն ինքնաբացարկի միջնորդություն ներկայացրեցին գործը քննող դատավոր Կարեն Բիշարյանը։ Ինքնաբացարկի հիմնավորումն այն է, որ այդ գործը նրան է մակագրվել ձեռքով։ Հակոբ Մարտիրոսյանը վկայակոչեց նախկին ՄԻՊ Արման Թաթոյանի ուսումնասիրությունները ավտոմատ էլեկտրոնային մակագրման համակարգը չգործելու պայմաններում ինչ խնդիրներ են լինում։

«Հիմք ընդունելով ինֆորմացված նախկին ՄԻՊ հարցումների հիման վրա դատողությունները, որ առանձին դատավորների չեն մակագրվում գործեր, որպես բողոքաբեր այսօր իրավունք ունեմ, ձեր դատական վարքագիծը գնահատելով,  կարծիք հայտնել, որ ձեզ հատուկ է մակագրված այս գործը. ոմանց չեն մակագրում հատուկ, ոմանց էլ  հատուկ մակագրում են»,- ասաց Մարտիրոսյանը։

«Արծվիկ Մինասյանի և Հակոբ Մարտիրոսյանի կողմից 2021 թ-ի հունիսի 11-ին ՀՀ գլխավոր դատախազին հասցեագրվել է հանցագործության մասին հաղորդում առ այն, որ 2020 թ-ի սեպտեմբերի 27-ից մինչև նոյեմբերի 9-ը ընկած ժամանակահատվածում ՀՀ վարչապետի պաշտոնը զբաղեցրած անձը՝ Նիկոլ Փաշինյանը, ուղղակի դիտավորությամբ կատարել է արարքներ, որոնցով օգնել է Ադրբեջանի Հանրապետությանը, որպեսզի վերջինիս կողմից Արցախի Հանրապետության դեմ իրականցված թշնամական գործունեության արդյունքում Ադրբեջանի Հանրապետության վերահսկողության ներքո անցնեն հայկական զինված ուժերի կողմից նախկինում ազատագրված Արցախի տարածքային ամբողջականության մաս կազմած տարածքները, այդ թվում՝ Հադրութի շրջանը և Շուշի քաղաքը, ինչը պաշտոնապես ամրագրվել է 2020թ նոյեմբերի 9-ին Ադրբեջանի նախագահի հետ ՀՀ վարչապետ Փաշինյանի ստորագրված հայտարարությամբ։ Բողոքաբերները գտնում են, որ դատախազությունն անգործություն է ցուցաբերել՝ այս հաղորդման հիման վրա Փաշինյանի հանդեպ դավաճանության հատկանիշներով  քրեական գործ չհարուցելով, այլ հաղորդումը բաժանելով երկու մասի և կցելով այլ գործերի։ Առաջին ատյանի դատարանը, սակայն, գտել է, որ դատախազությունը անգործություն չի ցուցաբերել․ այս որոշումն էլ Արծվիկ Մինասյանն ու Հակոբ Մարտիորսյանը  վիճարկել են Վերաքննիչ դատարանում»,- գրում է yerkir.am կայքը։