Ձեր վստահելի աղբյուրը

Այսօր առավոտյան Նիկոլ Փաշինյանի հրաժարականը պահանջող և Հայաստանի ու Արցախի անվտանգությամբ մտահոգ քաղաքացիները Երևանի մետրոպոլիտենում ակցիա իրականացրեցին՝ պարալիզացնելով մետրոյի աշխատանքը։ Կարմիր բերետավորները մի քանի երիտասարդների  կոպիտ ուժի կիրառմամբ բերման ենթարկեցին։ Դրանից հետո, ի նշան բողոքի, որ ոստիկանները բիրտ գործողություններ իրականացնելով բերման են ենթարկել իրենց ընկերներին, երիտասարդները  շրջափակեցին Երևանի մետրոպոլիտենի «Երիտասարդական» կայարանի երկու մուտքերը։

«Արցախ», «պայքար», «Արցախը երբեք չի լինելու Ադրբեջանի կազմում», «առանց Նիկոլ Հայաստան», «Նիկոլ դավաճան» , «Արցախը հայկական է, Նիկոլը թուրքական» վանկարկում են երիտասարդները։

«Ապրեք երեխեք ջան, շատ ապրեք»,- արձագանքում են քաղաքացիները, ովքեր ցանկանում են մտնել մետրոյի կայարան, սակայն սպասում են մինչև երիտասարդներն ավարտեն իրենց անհնազանդության գործողությունը։

«Ինչքան  ոստիկաները փորձեն մեզ ճնշել, բռնություն գործադրել, պատասխանը կրկնակի է լինելու»,- ֆեյսբուքյան ուղիղ եթերում ասաց «Հայաստան» խմբակցության պատգամավոր Արեգնազ Մանուկյանը։

Երիտասարդները մի քանի րոպեից բացեցին մուտքերը։ Այս ընթացքում որևէ կարմիր բերետավոր տարածքում չկար։