Ձեր վստահելի աղբյուրը

«Մասնագիտական խոտան թույլ տված լրագրողը պետք է ստանա իր խոտանի գնահատականը, եթե այն չի ստանում այնտեղ, որտեղից իր գործունեությունը ծավալում է, ապա պետք է ստանա սպառողից, որի ներկայացուցիչներից է պետական մարմինները»,-ԱԺ-ում հայտարարեց ՔՊ պատգամավոր Գուրգեն Արսենյանը՝ հարց ուղղելով «Զանգվածային լրատվության մասին» օրենքում լրացումներ կատարելու մասին նախագիծը ներկայացնող Արթուր Հովհաննիսյանին:

Վերջինիս և ՔՊ-ական մեկ այլ պատգամավորի՝ Լիլիթ Մինասյանի հեղինակած նախագծով առաջարկվում է մեկ տարվա ընթացքում երկու հանգամ պետական մարմնի ներքին աշխատակարգը և լրագորղների հավատարմագրման կարգը խախտող լրագրողին զրկել տվյալ մարմնում հավատարմագրումից:

Գուրգեն Արսենյանն առաջարկեց, որ օրենքի փոփոխությամբ այլ պետական մարմիններին էլ հնարավորություն տրվի չհավատարմագրել այն լրագրողին, որը երկու նախազգուշացումից հետո զրկվել է որևէ պետական մարմնում հավատարմագրումից:

Արթուր Հովհաննիսյանը հայտնեց, որ իր կարծիքով այն ճիշտ առաջարկ է և պետք է քննարկվի նախագծի առաջինից երկրորդ ընթերցման ժամանակ:

«Այո ճիշտ եք: Ըստ էության խախտման արձանագրումը  ենթադրում է, որ այլ պետական մարմինները նույնպես պետք է չհավատարմագրեն տվյալ լրագրողին»,-հայտարարեց օրենքի համահեղինակ ՔՊ-ական պատգամավորը:

Գուրգեն Արսենյանը հայտնեց, որ այդ դրույթը կատեգորիկ չպետք է սահմանել, այլ պետք է պետական մամիններին նման որոշում կայացնելու հնարավորություն տալ:

Արսենյանը նաև առաջարկեց ԱԺ-ի դեպքում ոչ թե մեկ տարվա ընթացքում արձանագրված խախտումների համար լրագրողին զրկել հավատարմագրումից, այլ մեկ նստաշրջանի դեպքում:

Ալեն Սիմոնյանը և Արթուր Հովհաննսիյանը երկու առաջարկն էլ ընդունելի համարեցին: