Ձեր վստահելի աղբյուրը

«Ցավոք սրտի, ժողովրդավարությունը արժեքաբանական միջոցից վերածվել է քաղաքական միջոցի»,-ասաց իրավապաշտպան, «Իրավական ուղի» ՀԿ համահիմնադիր Ռուբեն Մելիքյանը։

Նա մասնակցում է «Հայկական օրակարգ. բռնաճնշումներ` ժողովրդավարության դրոշով» թեմայով պանելային քննարկմանը։

Իրավապաշտպանի  խոսքով, եթե 20-րդ դարի կեսին այդ երկու բաղադրիչների միջև որոշակի հավասարակշռություն կար, ապա այսօր այդ բալանսը խախտված է, ինչը մեր մաշկի վրա զգում ենք։

«Այն կառույցները, որոնք օբյեկտիվ ու սուբյեկտիվ պատճառներով իրենց վերագրում են ժղովրդավարական հարցերում վերջնական խոսք ասելու իրավունք, շատ հաճախ չարաշահում են այդ հնարավորությունը, ինչի հետևանքով շատերի մոտ ժողովրդավարությունն ասոցացվում է ստի, կեղծիքի, վատ երևույթի հետ։ Դա շատ վատ է, քանի որ ժողովրդավարությունը պետք է, որպեսզի պաշտպանվեն մեր քաղաքացիների իրավունքները, ոչ թե դրա մասին անընդհատ բարձրաձայնեն»,-ասաց բանախոսը։

Նա ցավ հայտնեց, որ այսօր ժողովրդավարությունը դարձել է քաղաքական գործիք աշխարհքաղաքական հարցեր լուծելու համար։

«Այսօր կան ինչ-որ պետության քաղաքացիներ, որոնց նկատմամբ խտրական քաղաքականություն է իրականացվում կրթական, մշակութային ու այլ ոլորտներում այդ երկրի քաղաքացի լինելու համար։ Սա գլոբալ մակարդակով. այսինքն ճգնաժամն ավելի խորքային է՝ պայմանավորված ռուս-ուկրաինական պատերազմով»,-ասաց Մելիքյանը։

Նա հիշեց, որ 2020 թվականի հուլիսին նմանատիպ քննարկման ժամանակ ասել էր՝ արևմուտքը կարող է աչք փակել մեր երկրում առկա խնդիրների վրա, բայց ո՞րն է դրա գինը։

«Մենք պետք է գիտակցենք դա։ Առնվազն երեկ մենք կրկին համոզվեցինք, որ այդ գինը Արցախն է, մեր կենսական շահերն են, Հայաստանն է։ Ուզում եմ հետևություն անել, ժողովրդավարության պահապանները վերածվել են ժանդարմների, և դա շատ վատ է։ Մարդիկ  անցկացնում են ժողովրդավարության վերաբերյալ ֆորում և չեն հրավիրում ոչ միայն ընդդիմադիր պատգամավորներին, այլև այն մարդկանց, անհամեստաբար ասեմ նաև ինձ, որոնք անընդհատ բարձրաձայնում են մեր երկրի խնդիրների մասին։ Մինչդեռ եթե ինձ հարցնեն, ի՞նչ է ժողովրդավարությունը, ես կպատասխանեմ՝ երկրորդ կարծիք, այլընտրանքային կարծիք հարգելն է, մարդկանց բերանը չփակելն է, մինչդեռ մեր երկրում խոսքի համար դատվողների թիվը կտրուկ ավելացել է։ Սա  նշանակում է, որ ժողովրդավարությունը պրոբլեմատիկ է»,-ասաց իրավապաշտպանը։

Ռուբեն Մելիքյանը նշեց, որ ընդդիմադիր գործիչների նկատմամբ այսօր հետապնդումներ են իրականացվում մեծ մասամբ ՔՊ  իշխանության կողմից ընդունած օրենքներով։

«Դրանց թվում է նաև ծանր վիրավորանքի համար պատասխանատվության ենթարկելու օրենքը։ Օրեր առաջ գլխավոր դատախազությունը հրապարակեց, որ 800-ից ավելի  մարդ է այդ հոդվածով անցնում, ինչը մեծ թիվ է կազմում։ Երկրորդը՝ 226.2 հոդվածն է,  երրորդը՝ Չալաբյանի գործը, որի հոդվածում գործող իշխանությունն է փոփոխություն իրականացրել։ Ինչո՞ւ եմ ասում, ՔՊ կողմից ընդունած օրենքները, ոչ թե ՔՊ օրոք, քանի որ այս բոլոր օրենքներն ընդունվել են բացառապես իրենց ձայներով»,-ասաց Մելիքյանը՝ ավելացնելով, որ այս իշխանությունները Չալաբյանին առաջադրած հոդվածի մասով խաբել են արևմտյան գործընկերներին, թարգմանաբար ուրիշ տեքստ են ուղարկել կարծիքի համար։

Մելիքյանն ասաց, ծանր վիրավորանքի գործերի ճնշող մեծմասնության համար հարուցելու հիմք են դարձել ոչ թե հաղորդումները, այլ ԱԱԾ տնօրենի տեղակալի, ոստիկանության ստորաբաժանումների ներկայացուցիչների գրությունները։

«Նայում ես, ֆեյսբուքյում գրառում կատարողը ոչ էլ հանրային անձ է, մի 20-30 հետևող ունի։ Նման մարդկանց նկատմամբ շատ են հարուցված գործեր։ Ավելին, մարդիկ չեն էլ իմանում, որ նման օգտատերերի կողմից ծանր վիրավորված են, գործում չեն էլ ներգրավվում։ Շուտով մենք կունենանք դատավճիռների հրավառություն»,-ասաց Մելիքյանը։