Ձեր վստահելի աղբյուրը

Ազգային ժողովում կառավարության հետ հարցուպատասխանի օր է։ Այժմ այնտեղ Նիկոլ Փաշինյանին ու գործադրի անդամներին իրենց հարցերն են տալիս միայն  ՔՊ-ական պատգամավորները։ Երկու տասնյակից ավելի պատգամավոր է գրանցվել հարցեր տալու համար։

Ընդդիմադիր խմբակցություններն արդեն երկրորդ քառօրյան է, որ չեն մասնակցում ԱԺ նիստերին։ «Հայաստան» և «Պատիվ ունեմ» խմբակցության պատգամավորեն այժմ Ֆրանսիայի հրապարակում են հարցուպատասխանի մասնակցում։ Այս դեպքում ընդդիմադիր պատգամավորներին հարցերն ուղղում են հրապարակում ներկա քաղաքացիները։

Առաջին հարցն այն մասին է, թե ինչպե՞ս են նրանք տեսնում ղարաբաղյան հիմնախնդի լուծումը։
Հարցին պատասխանեց «Հայաստան» խմբակցության պատգամավոր Արմեն Ռուստամյանը։

«Արցախի հարցի լուծման ուղղությունն ու դրա հետ կապված հիմնական անելիքները մեր ժողովուրդն արդեն վաղուց ձևակերպել է, որևէ իշխանություն այլ բան չի կարող անել, քան իրականացնել  ժողովրդի կամքը, որն առաջին հերթին հենց Արցախի ժողովուրդն արձանագրել է»,- ասաց նա՝ հավելելով, որ իրենց այսօր երեք նախապայման են նշում, առանց որոնց Արցախի հարցի հայանպատ լուծում չի կարող լինել։

«Սա է, որ մենք պահանջելու ենք թե այսօրվա իշխանություններից, թե նաև եթե վաղը ձևավորվի ազգային իշխանություն, պարտավորված է լինելու այդ հայեցակարգով, սկզբունքներով առաջնորդվել»,- ասաց Ա. Ռուսատմյանը։

Նա թվարկեց այդ սկզբունքները. «Առաջինն Արցախի կարգավիճակի հարցն է։
Բացառել Արցախի որևէ կարգավիճակ Ադրբեջանի կազմում։ Սա եթե տեղի ունեցավ, կավարտվի Արցախի հայաթափմամբ։ Օրինակը՝ Նախիջևանը։ 

Արցախի հայաթափումը բացառող մյուս կարևոր պայմանը անկլավային վիճակի բացառումն է։ Եթե Արցախը մայր Հայաստանի հետ ցամաքային կապ չունեցավ, նույնպես Արցախում հայապահպանության հետ կապված խնդիր ենք ունենալու։

Երրորդ սկզբունքը Արցախի անվտանգության համակարգի ամրապնդումն է՝ տեղի հնարավորություններով անվտանգության ապահովում, Հայաստանը որպես Արցախի անկախության և անվտանգության երաշխավորի  հանձնառությունից բխած անմիջական մասնակցությունն անվտանգային  համակարգի ձևավորման հարցում, այսօրվա իրավիճակից թելադրված ռուս խաղաղապահ ուժերի անժամկետ ներկայություն»։

Արմեն Ռուստամյանն ասաց, որ պետք է ամրապնդել բանակը, ոչ թե թուլացնել, ունենալ ներքին համախմբում։

«Պետք է կարողանանք ազգովի այս խնդիրը բերել օրակարգ, դրա շուրջ համախմբման հասնել։ Վստահ եմ՝ այդ դեպքում կունենանք հայանպաստ լուծումներ, ինչ ունեցել ենք մինչև այս իշխանության գալը»,- ասաց ընդդիմադիր պատգամավորը։